Nao čuă sang mơdrô eng ao anăn Thổ cẩm Mara, gơmơi ƀuh anŏ mơak, dik dak, hơmâo pran dañ mơ̆ng ƀing dŏ mă bruă, hmư̆ bơrơklak jua măi tơčoh, jua prư̆ mơñam mrai mơñi kar hăng jua mơñi juăt hmư̆ laih amăng plơi pla.

Ƀu hơmâo hrăm amăng sang hră pơtô rơguăt mơñam mrai ôh, amai H’Loang Mlô, tơkeng thun 1996, ngă bruă mơñam eng ao hăng tơlơi pơmin, pran jua gir kơtir mơ̆ng ñu. Hrŏm hăng djă pioh gru ama grua amĭ, ñu ăt pơjing tơlơi pơplih phrâo, pơkra phrâo eng ao jing eng rip, ao pơdô̆, ao buh gah rơngiao ƀudah kơdung bak tui hăng gru phrâo. Mah pơplih tui hăng tơlơi arăng kiăng, samơ̆ ñu ăt gir pioh glăi gru bơnga ƀơi bơnal, ia iŏm mrai ăt tui đưm mơn, kiăng rim blah eng ao ƀrô tui rơnuk phrâo, ƀrô ƀuh gru đưm mơ̆ng djuai ania ñu. Amai H’Loang lăi: “Hơdôm hrơi blung a pơphun bruă bơwih ƀong, kâo bưp lu tơlơi tơnap biă, biă ñu lĕ ƀu hơmâo prăk. Ƀơi anŏ ñu pơmin či lui laih, samơ̆ yua juăt laih sĭ gơnam online, laih anun hơmâo ƀing neh, ƀing amai anun jing kâo gir ngă dong mơn. Ƀơ ƀrư̆, kâo tơgŭ bơwih ƀong hăng ngă kjăp tui. Truh ră anai, kông ti hơmâo 7 čô mơnuih mă bruă sit nik, 60 čô djru sĭ, hrŏm hăng 8 boh sang tơčoh, 8 boh sang mơñam hăng 3 boh sang pơkra bơnal. Rim čô mơnuih hơmâo prăk pơhrui mơ̆ng 3,5 truh 10 klăk rim blan”.

Rơngiao kơ bruă pơkra gơnam, sĭ mơdrô đĭ tui, amai H’Loang Mlô ăt djru brơi lu mơnuih amăng plơi hơmâo bruă mă. Adơi H’Lagi Mlô, glăk hrăm thun tal 2 Sang hră Đại học Tây Nguyên. Yua hơmâo tơlơi djru mơ̆ng amai H’Loang, ñu gir găn rơgao tơlơi tơnap drit druai, đah mơ̆ng dưi hrăm hră: “Kâo bơni biă kơ amai H’Loang, yua djru ba kâo lu biă. Mơ̆ng hrơi hơmâo ngă bruă tom amai, jing kâo thâo hluh anŏ yom mơ̆ng eng ao Êđê gơmơi. Kâo ăt thâo hluh mơn gru bơnga yua ƀing neh, ƀing wa mơñam, ñu hiam hăng glêh biă. Rơngiao kơ anun dong, kâo ăt hơmâo thim prăk či ƀong huă, hrăm hră dong, hơmâo prăk či đĭ rơdêh, apah sang dŏ, mơ̆ng anun jing hơđong laih či hrăm hră. Kâo čang rơmang pơ anăp amra hơmâo lu tui mơnuih thâo, hmư̆ ư hăng hor eng ao mơ̆ng djuai ania Êđê ƀing gơmơi”.

Hăng gru bơnga hiam phara, lăng hơmâo anŏ tơnap, anŏ yom, eng ao Dap Kơdư jai hrơi hơmâo lu gơyut gơyâo mơ̆ng jar kmar hmư̆ ư. Ayong Donovan Fink, tuai mơ̆ng čar Mi, lăi: “Kâo lăng hor, lăp hơdor biă. Ao anai buh ñu djhôl, mơak, bơnga ƀơi ao lĕ hiam mơn. Kâo mơak biă lơ̆m rai pơ anai, pel lăng eng ao. Anai jing ao hiam biă, phara biă hăng eng ao kâo juăt buh. Kâo či blơi glăi ha blah či brơi kơ sang anŏ, kiăng gơñu thâo hluh gru grua hiam anai”.

Pơ anăp anai, amai H’Loang Mlô čang rơmang bruă tơčoh mơñam eng ao amra đĭ kyar tui, djru ba lu mơnuih amăng plơi pla hơmâo bruă mă, hơmâo prăk ƀiă dong. Ñu kiăng ba eng ao anai truh djŏp tơring hăng djŏp dêh, kiăng gru grua kual Dap Kơdư anai hơmâo lu mơnuih thâo hăng pơpŭ: “Kâo čang rơmang bruă mơñam eng ao đưm mơ̆ng djuai ania gơmơi, pơtruh hăng ƀing rơgơi mơñam, biă ñu lĕ ƀing neh, ƀing amai, đah mơ̆ng djă pioh hăng bang hyu anŏ yom mơ̆ng gru grua. Tơlơi kiăng phun ñu lĕ ngă brơi bruă mơñam eng ao anai jing bruă mă phun, djru ba ƀing neh, ƀing adơi amai hơmâo prăk hơđong laih dong ba eng ao anai pơƀuh hyu djŏp tơring tơrang hăng gơyut gơyâo pơ jar kmar”.

Amăng tơlơi hơdip rơnuk anai, ƀing hlăk ai kah hăng amai H’Loang Mlô glăk djă pioh pran jua hor kơtang biă hăng bruă mơñam eng ao đưm. Hăng tơlơi thâo pơčeh, gir run, kơtưn ba hyu gru ama grua amĭ kiăng djŏp anih hmư̆ ư, pơmin sit pơ anăp, eng ao Êđê amra hmư̆ ư, pơtruh gru đưm hơđong kjăp mut hrŏm hăng tơlơi hơdip rơnuk phrâo./.