Hăng er mơñi rơnang mơ-ak, hmư̆ gap ƀrô, ƀing tơdăm djuai ania Êđê juăt pĕ gông brô̆ kiăng pơdah pran jua, tơlơi kiăng khăp ƀu-eng hăng ƀing dra. Gông anai ăt juăt pĕ hrŏm tơlơi adôh kưt hăng yŭ rơnang mơ-ak…Mơnuih kơhnâo kơhnăk Y-Dŭ Êban brơi thâo, kơnong ƀing tơdăm kah mơng thâo pĕ gông brô̆; hăng gông anai hơmâo pĕ amăng hơdôm mông ngui ngor mơ-ak amăng plơi pla. Gông brô̆ arăng lăng kar hăng “gơnam pơtruh nao rai” kơplah wah tơdăm dra amăng plơi pla.

“Đưm hlâo, gông brô̆ hơmâo pĕ amăng hrơi đĭ dŏ sang phrâo. Hơmâo mơnuih adôh kưt. Dua dong lĕ, anai ƀu djơ̆ kơnong pơƀuh pran jua hok mơ-ak amăng hrơi đĭ dŏ sang phrâo, gông brô̆ hơmâo pĕ ƀơi dring sang amăng hrơi tlam mơmŏt. Lơm amăng pran jua mơ-ak hăng hơmâo tơlơi hơget ƀuh truh lăi, pĕ gông brô̆ hmư̆ mơ-ak biă mă”.

Lơm pĕ gông brô̆, ƀing tơdăm ƀu ƀuh ao, tơngan gah ieo đŏt ƀơi hrĕ, tơngan gah hơnuă đet, laih dong đŏt phư get ia kiăng hmư̆ pơpư̆ hăng bang phara. Tơdah hơdôm djuai gông brô̆ pơpkŏn, get ia amra đang tơbiă gah rơngia ngă er bang tơbiă gah rơngiao, samơ̆ get ia mơng gông brô̆ amra ah nao ƀơi hlung mơnuih pĕ. Mơnuih kơhnâo kơhnăk Y-Dŭ Êban brơi thâo, mơnuih djuai ania Êđê pơkra mă djop bơnah mơng gông brô̆, laih anun mă hruh bơni pơlir djop bơnah jing sa boh gông.

“Gông brô̆ hơmâo pơkra mơng sa ƀĕ kram glông, ƀơi rơnuč gông arăng pơtlep nao sa plă kyâo anih hơmâo amăng kiăng kơ akă hrĕ gông. Gông hơmâo akă kjăp hăng sa get ia krô, jai prong jai hmư̆ mơ-ak. Gông brô̆ hơmâo 5 tut đŏt. Mơnuih thâo pơkra gông brô̆ lĕ mơnuih thâo ruă gông brô̆. Pơkra ăt tañ mơn mơng mơguah truh tlam amra pơgiong sa boh gông”.

Er mơñi mơng gông brô̆ ƀu kiăo tui er mơñĭ hơpă ôh mơ̆ tui tơlơi hor mơng mơnuih pĕ, hăng kar hăng pĕ sa tơlơi adôh mơng djuai ania Êđê. Rơngiao kơ bruă kiăng pơdah pran jua, pran khăp mơng tơdăm dra, gông brô ăt pĕ amăng mông ngui ngor mơ-ak tơdơi kơ mông mă bruă glêh glar pơ đang hmua. Er gông hmư̆ rơnang mơ-ak, pơhưč lu mơnuih, anai lĕ gông juăt pĕ pơngui ƀing čơđai dong. Mơnuih kơhnâo kơhnăk Y-Dŭ Êban brơi thâo:

“Rĭm kual ăt hmư̆ er gông brô̆ phara mơn. Tui hluai mơnuih pĕ mơn. Ăt pĕ hrŏm sa tơlơi adôh samơ̆ ƀing hlơi thâo pĕ amra hmư̆ er gông brô̆ bang mơ-ak ƀiă, hăng sit biă ñu tơdah ƀing kơhnâo kơhnăk lĕ mơnuih pĕ gông brô̆ sui thun amra pơdah tong ten pran jua hăng er gông brô̆ brơi mơnuih dŏ hmư̆”.

Mơnuih djuai ania Êđê lăng yôm biă mă gông brô̆, ƀu djơ̆ kơnong mơng boh pơhiăp đôč ôh ăt pơdah mơng tơlơi pơpŭ, jê̆ giăm, pơlir hơbit hăng er gông brô̆. Lơm pĕ gông brô̆, amăng pran jua ăt hur har mut hrŏm, wơr hĭ tơlơi hning rơngô̆t, tơlơi glêh glar amăng tơlơi hơdip. Đưm hlâo adih, djop sang anŏ djuai ania Êđê lêng kơ hơmâo gông brô̆, hăng djop plơi pla hơmâo lu mơnuih thâo pĕ gông brô. Samơ̆ tui anŏ pơplih ră anai, lu mơnuih wơr hĭ yơh er gông brô̆. Anai ăt lĕ tơlơi bơngŏt mơng ƀing kơhnâo kơhnăk tha rơma mơng djuai ania Êđê. Mơnuih kơhnâo kơhnăk Y-Dŭ Êban brơi thâo: “Tơdơi anai dŏ hơmâo mơn mơnuih pơkra gông brô̆ ?”, “Er gông brô̆ ăt dŏ hmư̆ na nao mơn ?”.

“Hlơi kiăng hrăm pĕ brô̆ kâo amra pơtô brơi mơtăm. Samơ̆ hlăk ai ră anai kơnong đing nao bruă hrăm hră hăng hyu ĕp prăk kak đôč. Ƀu hơmâo prăk kak pioh pơtô hrăm, pơtrut pơsur ƀing čơđai kiăo tui hrăm. Ră anai dŏ ƀiă đôč mơnuih thâo pĕ gông brô̆, đa plơi pla dŏ sa, dua čô, đa hơmâo plơi pla ƀu hơmâo hlơi dong tah thâo pơkra hăng pĕ gông brô̆. Anai ăt lĕ tơlơi ngă hning rơngô̆t hăng čang rơmang djop plơi pla amra đing nao ƀiă dong. Tơdah ƀu pơtô glăi hăng djă pioh amra ngă rơngiă hĭ gru grua mơng ơi yă ta pioh glăi”.

Er hmư̆ rơnang mơng gông brô̆ ƀu djơ̆ kơnong lĕ er hmư̆ mơ-ak, gơnam pioh ngă mơ-ak amăng pran jua ƀu kơƀah ôh amăng tơlơi hơdip mơng mơnuih djuai ania Êđê, jing gơnam tô nao rai amăng hơdôm mông ngui ngor đôč ôh ăt lĕ anŏ yôm mơng gông brô̆ djuai ania Êđê dong./.