Hrơi jơnum ngui hơmâo pơphun amăng 2 hrơi lơ 12 hăng 13/4, hơmâo rơbêh 800 čô mơnuih kơhnăk, mơnuih ƀôn sang djuai ƀiă mơ̆ng 17 boh tơring glông, plơi prong ƀơi tơring Gia Lai. Hăng anăn “Jua mơñi bang amăng glai klô”, jơlan hơdră pơphun hăng tơlơi ngă yang pơƀuh glăo rup djŏp djuai ania glăi pơtum ƀơi “plơi hrŏm” - anih pơtruh gru grua ia iŏm hiam, pơtruh pran đăo kơnang, anăp nao akŏ pơdong Gia Lai pơdrong sah, klă hiam, gum pơgôp hăng đĭ kyar kjăp. Tŏ tui hơmâo tơlơi ngui ngor atông čing pơƀuh gru grua tơlơi hơdip mơda, pran jua hrưn đĭ mơ̆ng mơnuih ƀôn sang djuai ƀiă.

Tơdơi kơ hrơi pơphun jơnum, hơdôm grup mơnuih kơhnâo hơmâo pơƀuh, ngă glăi lu tơlơi ngă yang, tơlơi phiăn đưm kah hăng: Tơkung ia glăi pơ plơi, pơtrum kơbao, ngă yang pơpŭ, ngă yang Sơmă Kơcham, adoh tuồng, pĕ atông goong brô̆ đưm, trah rup, mơñam mrai, mơñam rêu rô...Yă Lê Thị Thanh Thủy - Khua anom bruă Gru grua - Pôr pơthâo hăng Bơrơguăt drơi jăn tơring glông Mang Yang, tơring čar Gia Lai brơi thâo: “Mang Yang ba nao pơ hrơi jơnum hơdôm gru grua hiam hloh, hmư̆ hing hloh. rơngiao kơ anun, kâo kiăng hrơi jơnum ngui hơmâo ngă na nao đah mơ̆ng djă pioh gru grua hiam mơ̆ng djuai ania Bahnar hăng djŏp djuai ania pơkŏn ƀơi tơring glông”.

Thun anai, grup rơgơi kơhnăk mơ̆ng plơi prong Ayunpa hơmâo 46 čô gum atông čing, mơñam mrai, ngui tơlơi ngui đưm...Ơi Nay Ka dŏ ƀơi Ƀon Phu Ama Nhuer 2, să Ia Rtô, plơi prong Ayunpa lăi: “Grup mơ̆ng Ayunpa gơmơi amra pơƀuh glăi tơlơi ngă yang huă pơsat “huă blan” - sa gru grua hiam mơ̆ng djuai ania Jarai. Anai jing tơlơi ngă yang bơngăt atâo, ngă yang rơngôt kơ pô djai mơ̆ng djuai ania Jarai Cheo Reo. Bruă pơphun glăi tơlơi ngă yang anai kiăng pơƀuh gru grua tơlơi phiăn đưm mơ̆ng djuai ania Jarai, pơtă pơtăn kơ rơnuk hlăk ai thâo hluh hăng pơpŭ gru grua hiam mơ̆ng ơi yă ta đưm”.

Mơnuih kơhnăk Siu Thưm - dŏ ƀơi Pleiku Roh, plơi prong Pleiku brơi thâo, grup atông čêng adoh suang mơ̆ng plơi ñu hơmâo 40 čô, amra atông čing mơak kah hăng “Čêng mơak hrơi blah rơgai”, hrŏm hăng tơlơi adoh đưm. Anai jing hrơi či pơƀuh kơ ƀing tuai hơdôm gru grua hiam mơ̆ng djuai ania pô: “Hrơi anai ƀu djơ̆ hrơi pơplông hăng grup pơkŏn ôh, mơ̆ jing tơlơi pơbưp ngui ngor. Yua hnun, ƀing gơmơi čang rơmang ba glăi gru grua hiam hloh mơ̆ng djuai ania Jarai Pleiku, pơƀuh hăng ƀing gŏp, ƀing tuai rai ngui pơ Gia Lai. Yua hnun ƀing gơmơi lêng kơ hok mơak, ngui ngor hrŏm”.

Hrơi jơnum ngui hơmâo lu ia iŏm gru grua hăng lu bruă pơƀuh glăi tơlơi ngui ngor amăng plơi pla, buh eng ao hiam, adoh suang, ƀong huă hăng ngui tơlơi ngui đưm; hơdôm jơgăn pơdă gơnam hmư̆ hing mơ̆ng plơi kah hăng kơphê, tơpai čeh, asơi kos, mơnŏng ŏm...djru pơƀuh hyu gru grua hiam mơ̆ng neh met wa djŏp djuai ania amăng tơring čar./.