Kual Nhơn Lý hơmâo lu anŏ gêh găl čơkă tuai hyu ngui amăng ia rơsĭ yua hơmâo gru grua hiam phara kah hăng tơlơi ngui ngor ngă yang mă akan hơdang Xương Lý, pra yang ơi Nam Hải hrŏm hăng lu gru grua hiam phara wơ̆t anih hyu ĕp lăng hiam amăng plơi pla. Pioh pok pơhai tŭ yua tơdrun kompan mă akan hơdang hrŏm hăng čơkă tuai hyu ngui lĕ, Jơnum min mơnuih ƀôn sang tơring čar Gia Lai pơtrun hiăp kơ djop gơnong bruă pơdjơ̆ hrŏm jŭ yap glăi, ming pơkra phrâo anăp či ngă bruă.

Rơđah biă ñu, Gơnong bruă Gru grua, Pơrơguăt drơi jăn hăng Tuai čuă ngui rơkâo ming pơkra glăi, man pơdong hăng čih anăn gơnam sĭ mơdrô kơ tuai hyu ngui Nhơn Lý, Nhơn Hải tui anăp ngă bruă djă pioh plơi pla gru grua mă akan hơdang hăng ngă yang pơpŭ kơ bruă mă akan hơdang. Gơnong bruă ngă hmua hăng pơgang kông ngăn ayuh hyiăng jŭ yap glăi djop tơdrun mă akan hơdang, kơsem min bruă ngă hrŏm čơkă tuai hyu ngui sui thun pơ anăp adih, rơkâo đĭ bruă git gai wai lăng, mă yua djơ̆ găl. Gơnong bruă Man pơdong lĕ sem glăi pơkă hnơ̆ng man pơdong, kiăng abih bang ngă hrŏm sa hnơ̆ng man pơdong atur pơđĭ kyar.