Ƀơi plơi prong Pleiku, Khul bơwih brơi tuai čuă ngui tơring čar Gia Lai phrâo pơphun jơnum “Pơpŭ gru grua djuai ania ƀiă-Gum hrŏm pơđĭ kyar bơwih brơi tuai čuă ngui”, hăng tơlơi mut hrŏm mơng ƀing pơ ala anom bruă bơwih brơi tuai čuă ngui dêh čar Việt Nam hăng lu anom bruă bơwih brơi tuai čuă ngui amăng tơring čar hăng mơng pơkŏn. Ƀing nao jơnum hơmâo pơčrông sai, pơlăi nao rai lu hơdră bruă pơlir pơđĭ kyar tuai čuă ngui hăng djă pioh gru grua ƀon lan, laih dong lăi nao tơlơi gun ră anai lĕ kơƀah jơlan gah tong ten brơi kơ bruă bơwih brơi tuai čuă ngui amăng plơi pla.

Lu tơlơi pơgôp kiăng Gia Lai pơjing jơlan hơdră lăi pơthâo sui pơ anăp, pơsit tong anăn apăn bơwih brơi tuai čuă ngui phara hăng hơdôm tơlơi dưi mơng čing hơgor, tơlơi akhan hri, sang drông. Sit biă ñu, kiăng jao glăi ƀing pô ngă akŏ brơi mơnuih djuai ania ƀiă, djru brơi ƀing gơñu bơră ruai tơlơi yôm phara amăng rup rap, video hăng plang mơnuih mơnam, pơgôp ngă lar hyu gru grua tơring čar Gia Lai rơđah rơđông, hơđong kjăp.