Gong Prăk hơmâo pơkra mơ̆ng ia kông luk hrŏm hăng ia prăk, phara hăng čing pơkŏn. Čing anai hơmâo 3 boh čing hơmâo atut, prong mơ̆ng 15-20cm, ia iŏm ñu ia kông tuh nao ƀiă ia jŭ hai. Yŭ čing Gong Prăk hmư̆ rơ-un kah hăng jua čing pơtâo, hơmâo anŏ kơdrưh kah hăng čing Yau, jua mơñi ñu phara biă mă: ƀơi anŏ ñu mơñi tơ-ua sui, hmư̆ kleng klong, ƀơi anŏ ñu rơnguă bang hyu ataih, kơtang, ngă kơ arăng hmư̆ anŏ mơyang hăng jê̆ giăm.

Kiăng hơmâo ring čing Gong Prăk, djuai ania M’nông khŏm plih hăng kơbao, rơmô hăng djuai ania Lao wơ̆t hăng Kur. Hơmâo ring čing nua ñu hơdôm pluh drơi kơbao prong. Yua hnun, Gong Prăk hơmâo lăng jing gơnam yôm, ƀu thâo anŏ yap ôh, kơnong sang anŏ pơdrong kah mơ̆ng hơmâom laih anun pioh glăi pơ lu rơnuk.

Mơnuih kơhnăk Thị Mai, plơi Bu Njranglu, să Đức An, tơring čar Lâm Đồng, sa amăng mrô ƀiă đôč sang anŏ dŏ djă čing Gong Prăk brơi thâo:“Mông hne dŏ ƀiă đôč mơnuih thâo atông čing anai. Amăng plơi gơmơi, grup čing kơnong hơmâo mơ̆ng 3 -4 čô đôč thâo atông. Gong Prăk jing gơnam yôm biă mă, hơmâo pioh glăi hơdôm rơnuk laih mơ̆ng sang anŏ gơmơi. Ƀu kơnong pioh glăi kơ rơnuk tơdơi ôh, gơmơi ăt pơtô gơñu hrăm atông dong. Kâo hơmâo ama kâo pơtô, bơ ră anai kâo pơtô glăi ană kâo, kơ ƀing hlăk ai, kiăng thâo anŏ yôm mơ̆ng jua čing Gong anai rim wơ̆t atông”.

Hăng djuai ania M’nông, čing hơmâo atut gơñu iâu gong, bơ ƀu hơmâo atut gơñu iâu čing lor. Hăng Gong Prăk, hlâo či atông, pô kơhnăk khŏm ngă yang čing hăng tơpai čeh hăng mơnŭ kiăng pơpŭ. Atông čing hai ñu phara mơn: pô kơhnăk djă bong hrĕ brơi čing ñu bơrơdung hăng ngŏ, tơngan ha gah djă gai atông ƀơi atut, mơñi bang hyu kơtang, djŏp anih hmư̆. Mơnuih kơhnăk Thị Mai brơi thâo dong:“Phara hăng čing juăt ƀuh, Gong Prăk ñu juăt hơmâo atông amăng hrơi jơnum ngui prong đôč kah hăng ngui ngor plơi pla, ngă yang ngui ngor pơdơi pơdă,ngă yang pơdong plơi ƀudah ngă yang plơi. Hlâo či atông, neh met wa khŏm ngă yang čing. Tơlơi ngă yang anai pơƀuh tơlơi pơpŭ yôm hăng gơnam yôm anai”.

Ră anai, amăng kual mơnuih ƀôn sang djuai anai M’nông dŏ ƀiă đôč čing Gong Prăk. Mrô mơnuih thâo atông djơ̆ ăt hui mơn, juăt ƀing tha kah thâo. Rim wơ̆t Gong Prăk mơñi amăng hrơi ngui ngor prong, anun ƀu kơnong jing jua mơñi mơ̆ng goong brô̆ đôč ôh, ăt jing jua pơhiăp mơ̆ng ơi yă, jing gơnam yôm biă mă. Mơnuih kơhnăk Thị Dơn, amăng grup atông čing plơi Bu Njranglu, să Đức An, tơring čar Lâm Đồng brơi thâo:“Anai lĕ Gong Prăk yôm biă mă, rim wơ̆t hơmâo tơlơi ngă yang prong kah mơ̆ng ba atông. Lơ̆m atông Gong Prăk, kâo hmư̆ kar hăng jua pơhiăp mơ̆ng ơi yă đưm ră ruai tom ană tơčô. Gơmơi amra gir djă pioh hăng pơtô glăi kơ rơnuk tơdơi”.

Rim jua mơñi mơ̆ng Gong Prăk hơmâo pơƀuh phara, lăp djơ̆ hăng tơlơi ngui ngor mơn, jing tơlơi pơtruh ană mơnuih, yang rơbang hăng glai klô. Hăng djuai ania M’nông, čing hơgor jing pơkă tơlơi rin pơdrong, tơlơi kơdrưh mơ̆ng sang anŏ, kơnung djuai. Bơ hăng Gong Prăk, anun lĕ gơnam yôm kơnong kơ ƀing pơdrong đôč dưi blơi, hơmâo lăng yôm kar hăng sa gơnam yôm pioh glăi kơ djŏp rơnuk./.