Găn rơgao 35 thun akŏ pơdong hăng pơđĭ kyar, Grup đah kơmơi phin rup Hải Âu – sang hrŏm mơ̆ng ƀing đah kơmơi apăn bruă phin rup hăng hmư̆ ư phin rup hiam, hơmâo pơƀuh hăng bruă phin rup rơgơi, hơmâo lu mơnuih mă hră pơpŭ yom amăng khul phin rup Việt Nam hăng Jar kmar. Ƀrô hrơi ngă lơphet 35 thun akŏ pơdong, Grup Hải Âu ba pơƀuh hơdrôm hră rup hơmâo anăn: “Gru hiam amăng tơlơi hơdip djŏp djuai ania Việt Nam”.

54 pok rup hiam hơmâo pơdă tal anai jing hơmâo ruah mơ̆ng 298 pok rup mơ̆ng 25 čô amăng hơdrôm hră rup “Gru hiam amăng tơlơi hơdip djŏp djuai ania Việt Nam”. Yă Nguyễn Hồng Nga ding kơna Khul apăn bruă git gai Khul phin rup rơgơi Việt Nam, Kơ-iăng khua khul phin rup ƀôn prong Hồ Chí Minh, Kơ-iăng khua Grup phin rup Hải Âu brơi thâo: “Kiăng hơmâo rup hiam in amăng hơdrôm hră “Gru grua hiam amăng tơlơi hơdip djŏp djuai ania Việt Nam; Grup gơmơi hơmâo pơphun bruă amăng 2 thun, laih anun ruah mă mơ̆ng hơdôm rơbâo pok rup, či ruah rup dưm amăng hơdrôm hră hăng pơdă prưng. Anai jing akŏ bruă tơnap biă, tal anai hơmâo 36 phung djuai ania, gơmơi  dưm rup amăng hơdrôm hră jing sa tơlơi gir prong biă. Yua dah, amăngrim djuai ania lĕ hơmâo lu phung djuai dong mơn, gơmơi kiăng ba abih djŏp djuai ania mơ̆ng Kơdư trun pơ Dơnung, mơ̆ng Dap Kơdư, lŏn dăo truh kơ kual ataih yaih, anih mơ̆ gơmơi juă tơkai nao laih amăng 35 thun”.

Nao lăng rup, mơnuih ƀôn sang hơmâo lăng anŏ hiam mơ̆ng glai klô, ană mơnuih hăng gru grua ƀơi djŏp lŏn ia ta hăng lu tơlơi pơmin phara amăng hơtai boh, pơhưč amăng pran jua hăng anŏ dlăm mơ̆ng hơdôm pok rup mơ̆ ƀing đah kơmơi amăng Grup Hải Âu phin rai. Ơi Nguyễn Trùng Nhị, dŏ pơ ƀôn prong Hồ Chí Minh lăi:“Mơta lăng mơ̆ng ƀing adơi amai amăng Grup phin rup Hải Âu brơi ƀuh hơdôm tơlơi pơmin phara kơ mơnuih djuai ania ƀiă, kâo lăng djơ̆ biă, kiăng pơpŭ, amăng rup djă ba gru grua, tơlơi hơdip phara mơ̆ng rim djuai ania amăng gru grua hrŏm Việt Nam”.

Adơi Trà My, čơđai sang hră Gưl prong Rmit, brơi thâo:“Rai lăng pơdă prưng rup hrơi anai, kâo hơmâo lu tơlơi lăp hơdor, ha bơnah lĕ ia iŏm abih bang rup leng kơ hiam ƀhêm, hyơ hyor. Ană mơnuih hơmâo pơƀuh rai ƀu kơnong ƀơi ƀô̆ mơta đôč ôh, ăt pơƀuh amăng anih anom, ană mơnuih amăng anih anom glai klô, ană mơnuih amăng anih gơñu hơmâo tơkeng rai”.

Rơngiao kơ bruă pơdă prưng rup, Grup Hải Âu ăt kah pơpha brơi prăk mơ̆ng hơdôm pok rup, hơdrôm hră rup, hăng bruă pơdă prưng anai pioh ngă keh prăk djru mơnuih mơnam, gum djru mơnuih tơnap tap, biă ñu lĕ ƀing djơ̆ jrao hret dioxin. Pơdă prưng Gru hiam amăng tơlơi hơdip djŏp djuai ania Việt Nam pok bah amăng tui hluai či mut yơh ƀơi Sang gru đưm Đah kơmơi Việt Nam truh abih lơ 15/10.