Lơ 1/12/1945, jing lơ 27/10 blan ta thun Ất Dậu, lơ̆m hlăk rŭi truh pơ plơi prong Ƀuôn Hô, khul ling tơhan hơkrŭ dêh čar ta ayăt Prang krăp blah, pơnah djơ̆ 100 čô tơhan pơsăn drơi laih anun lu mơnuih ƀôn sang lêng kơ ƀing tha rơma, đah kơmơi, čơđai muai plơi Lạc Giao djai. Tơdơi anai, mơnuih ƀôn sang mă hrơi, jing lơ 27/10 blan ta rim thun kiăng ngă hrơi huă pơsat h’ŭ kơ ƀing tơhan hăng mơnuih ƀôn sang djai hlăk anun.

Ƀơi mông ngă yang h’ŭ hơdor glăi ƀing ngă hơkrŭ lŏn ia, lu khua mua nao čuh ñang pơyơr bơnga hăng lok glăi gru grua phun hing ang lơ 27/10 blan ta thun Ất Dậu 1945, kiăng pơdah rai pran jua hơdor tơngia, hning rơngôt hăng ƀing tơhan laih anun djop gưl rơnuk mơnuih ƀôn sang tuh drah pơčah asar nao hlâo. Kiăng lok glăi pơtă pơtăn ană plơi pla, biă mă ñu ƀing hlăk ai čơđai rơnuk anai khom hơdor pioh gru grua “Ƀong boh hơdor kơ pô pla, mơñum ia hơdor kơ pô klơi”; mơ̆ng anun pơđĭ tui tơlơi pơmin pran jua, glăm ba amăng bruă man pơdong hăng pơgang Lŏn ia.