Amăng rim hrơi năm hrơi tơjuh, Ayong A Huyền lêng kơ pơtô čơđai amăng plơi hrăm atông đing t’rưng, adoh tơlơi adoh Sêdang. Ñu hrŏm hăng mơnuih kơhnăk Đinh Xuân Đề (pô adoh mơ̆ng Khul adoh suang tơring čar Kon Tum hơđăp) pơtô brơi, prăp rơmet jơlan hơdră adoh suang kơ ƀing hlăk ai ƀơi hơdôm boh să, djru ƀing čơđai dưi pơplông pơ anih prong hloh. Tơlơi hor amăng pran jua ñu kar hăng apui jă bluk amăng pran mơnuih kơhnăk A Huyền, pơhưč pran jua neh met wa amăng plơi:“Bruă pơkra, pĕ atông goong brô̆ đưm hơmâo sang anŏ, neh met wa, giong anun ƀing ană amon, adơi đeh amăng plơi dong yua hăng pơtrut pơsur. Ƀu kơnong neh met wa djuai ania Sêdang đôč ôh, wơ̆t hăng adơi ayong djuai ania Yuan, ba ană bă ñu nao pơhmư̆ hăng hrăm atông čing, atông đing t’rưng. Sang anŏ tŭ ư brơi kâo kiăo tui bruă adoh suang pĕ atông goong brô̆. Yua dah, pô kâo ăt kah hăng sang anŏ, neh met wa amăng plơi kiăng hơmâo djă pioh, răk lui gru grua hiam mơ̆ng đưm, tơdơi anai huăi rơngiă ôh”.

Bơ ayong A Bliêt ƀơi Kon Wang, să Tân Tiến, Dak Lăk jing akŏ pơdong dua grup atông čing –adoh suang brơi ƀing čơđai, nao ngui, jơnum hrŏm hăng hơdôm tơlơi ngui prong kah hăng Jơnum ngui kơphê Buôn Ma Thuột, Jơnum ngui sầu riêng tơring glông Krông Pač…Ñu ăt čih pơkra, prăp rơmet hơdôm tơlơi adoh suang kah hăng “Mơnŭ tơdjô̆”, “Jua čing plơi gơmơi” hơmâo mă pri prong hloh amăng hơdôm tal pơplông mơ̆ng tơring čar. 2 čô ană ñu ăt pơtrut tui gru đưm jua goong brô̆ mơ̆ng sang anŏ:“Amăng 2 grup atông čing hơmâo 28 čô, amăng anun hơmâo 2 čô ană kâo gum ngă. Ră anai, hơmâo ană prong glăk hrăm tal 2 Sang hră Cao đẳng Văn hoá Nghệ thuật Dak Lăk, ñu hrăm pĕ piano, rơngiao kơ anun ñu ăt hrăm thim djuai goong brô̆ djuai ania ƀiă dong”.

Lơ̆m internet đĭ kyar, mơnuih kơhnăk A Huyền hăng A Bliêt ăt mă yua glông pôr pơhing mrô kah hăng facebook, Zalo…či pơƀuh pran jua hor, pơtrut pran jua hor tơlơi adoh suang, pĕ atông goong brô̆ djuai ƀiă kơ rơnuk hlăk ai. Ayong A Huyền brơi thâo:“Bruă ba jua goong brô̆amăng plang internet lĕ kiăng hơmâo lu mơnuih thâo kơ yŭ goong brô̆ đưm kual Dap Kơdư. Kâo ăt mơak biă mă, yua tŭ yua,pơhưč lu mơnuih like. Lăi biă hă, kiăng tơlơi adoh, gông brô̆ ba đĭ amăng plang internet jing ăt kiăng hơmâo thim măi mok rơgơi čih kuai, hrip mă rup či pơƀuh đĭ. Kiăng iâu pơthưr ƀing adơi, ană amon pơƀut adoh suang…jing clip amra pơhưč lu mơnuih lăng hloh. Hrơi blan rơgao, yua ƀing gơyut kuai clip tui pran hor, phin rup yua kâo pĕ atông, giong anun adơi ayong ba pơƀuh amăng plang internet. Ƀing gơyut ƀuh mơ-al lĕ gơnu pơsur hloh, kâo mơak biă mă lơ̆m mơ-it đĭ clip yua kâo pĕ atông”.

Hrŏm hăng pran jua hor ba rup hăng jua goong brô̆, tơlơi adoh đưm mơ̆ng ñu mơit amăng plang internet, ayong A Bliêt brơi thâo:“Kâo hơmâo ba rup ƀing čơđai atông đing t’rưng, atông čing, adoh, suang…ƀơi hơdôm plang internet. Khă hnun, yua ră anai gơmơi aka ƀu hơmâo măi yôm či kuai phin rup anun aka ƀu ba đĭ amăng plang facebook, zalo lu ôh. Kâo kiăng pơ anăp anai, lơ̆m sĭ goong brô̆ kâo pơkra, ƀudah nao pĕ atông tơdah hơmâo prăk kâo amra blơi măi kuai yôm či djă pioh hơdôm tơlơi pĕ atông, adoh suang ƀơi plang internet, kiăng pơƀuh gru grua hiam djuai ania Sêdang hăng ƀing dŏ lăng pơ hơdôm kual”.