Hăng anăn “Yŭ mơñi bang Čing kual Dap Kơdư - Ngŏ Dơnung ASIA pơtum hrŏm”, jơlan hơdră pơƀut 12 grup apăn atông čing mơ̆ng Gia Lai, Dak Lăk, Lâm Đồng, hơdôm boh tơring čar gah Kơdư hrŏm hăng grup adoh suang Thái Lan, Lao, hăng Malaysia. Jơlan hơdră anai pơpŭ kơ Anih gru grua atông čing ring hơgor Dap Kơdư - gru grua yom gah bơngăt bơnguai mơ̆ng ană mơnuih ta, laih dong pơƀuh gru hiam hăng tơlơi gêh gal bơwih ƀong čơkă tuai hyu ngui Lâm Đồng.

Tui hăng ơi Đinh Văn Tuấn - Kơ-iăng khua Jơnum min mơnuih ƀôn sang tơring čar Lâm Đồng, hơdôm bruă jơnum ngui amra pơphun ha wơ̆t mơtăm ƀơi 3 kual hmư̆ hing phara: “rơbâo bơnga”  Đà Lạt, “ia rơsĭ mơtah” Bình Thuận hăng “glai čư̆ prong” Dak Nông. Tơlơi anai anăp nao bruă akŏ pơdong Festival atông čing 2 thun ha wơ̆t, djru djă pioh gơnam yom, pơtrut pơbưp nao rai, ngui ngor gah yŭ mơñi Ngŏ Dơnung ASIA hăng pơsit tơlơi kơdrưh mơ̆ng Lâm Đồng - kual lŏn pơtum, bang hyu anŏ yom gru grua Dap Kơdư hrưn nao pơ rŏng lŏn tơnah.