Yă Nguyễn Thái Tường Vân, Khua kông ty ba tuai hyu ngui Thái Loan, hơmâo sang bruă pơdong ƀơi tơring čar Đồng Nai brơi thâo, anom bruă mơdrô gơñu dưi hơmâo Gơnong bruă gru grua, Pơrơguăt drơi jăn hăng tuai čuă ngui tơring čar Lâm Đồng jak iâu nao ĕp lăng anih či ba hyu tuai, lăng anih anom gru grua đưm-gru grua hiam, mơnong ƀong huă, bơwih bơwăng pơdong anih ngui ngor mơak….hmư̆ hing ƀơi 3 boh kual: Múi Né, Đà Lạt hăng Gia Nghĩa hăng Gia Nghĩa. Rơđah biă mă ñu, grup nao ĕp lăng lu anih anom lŏn mơnai glai klô hiam dêh čar wai lăng Bàu Trắng, Anih anom gru grua pơkra ia mơsin Bảo tàng nước mắm hăng ĕp lăng jơlan hơdră Fisherman Show ( Mũi Né), Delight Park Đà Lạt, XQ Sử quán, anih tuai čuă ngui ƀơi Liangbiang Land hăng jơlan hơdră adoh suang anăn “Bừng sáng vùng đất hùng vĩ” ( Đà Lạt); kual tuai nao čuă lăng lŏn mơnai ia dơnao Tà Đùng, plơi gru grua hiam glai klô Eva Village sang djă pioh pơdă rup gơnam gru grua jua mơñi ( Gia Nghiã),…

Hăng yă Vân lĕ, hơdôm anih anai či ba glăi tơlơi găn rơgao mơak hiam biă mă, ñu lăi:

“Ƀơi Phan Thiết hơđăp, kâo ƀuh jơlan jơdră Fisherman Show mơak biă mă mơnuih ƀôn sang Việt Nam lu mơnuih aka ƀu thâo ôh. Ƀing gơmơi nao pơ Đà Lạt lĕ ăt hơmâo mơ̆n anŏ phrâo, akŏ pơdong hăng pơjing rai laih hơdôm blan rơgao. Kâo čang rơmang biă mă lĕ jơlan hơdră amra pơhưč ƀing tuai lu hloh či lăng. Kâo pô ngă amăng bruă ba tuai hyu ngui amăng 29 thun laih rơgao, ƀuh lu jơlan hơdră anai hiam mơak biă mă”.

Bơ ơi Hoàng Công Định, Khua kông ty Dima-tour lăi, tơring čar Lâm Đồng phrâo lĕ kah hăng plơi phrâo hiam pioh kơ tuai čuă ngui, pơtum pơƀut lu anŏ gêh găl kah hăng čư̆ siăng, kơčong čư̆ dlông, ia dơnao prong, ia rơsĭ hiam tơbung prong hăng lu bul pơtâo, plao amăng ia rơsĭ hiam rô̆ mơak mơai. Yua kơ anun, anăn păn sĭ mơdrô ba tuai hyu ngui či pok pơhư prong hloh.

Ƀơi anăp kơ anŏ gêh găl anun, lu sang bruă mơdrô amra man akŏ pơjing lu gơnam sĭ mơdrô kơ tuai čuă ngui mơ̆ng lu kual phara soh, pơhrua hĭ hơdră sĭ mơdrô raih daih, hơjăn phara ba kual. Ƀuh rơđah, hơdôm anih čuă ngui amăng kual ia rơsĭ mơtah hiam, tơbung prong laih anun amăng kual čư̆ siăng hñip hñap kyâo glai mơtah mơda, anih pơdơi pơdă, ngui ngor hiam hmư̆ hing kah hăng pơ Mũi Né, Phú Quý hăng đĭ nao pơ Đà Lạt, kual Dap kơdư hiam laih anun ba hyu tuor tuai hyu ngui ƀơi Dak Nông hơđăp lêng kơ hiam soh. Mah hơmâo laih anŏ gêh găl tui anun, samơ̆ tui hăng ơi Định lăi, jơlan glông nao rai yơh anŏ ngă gun kơ tơlơi lir hơbit amăng kual plah wah mơ̆ng Muĩ Né, Đà Lạt hăng Gia Nghĩa.

“Laih pơmut hrŏm, ƀing gơmơi hơmâo pơphun lu tuor tuai hyu ngui plah wah mơ̆ng Mũi Né hăng Đạ Lạt pơphun na nao, samơ̆ hlăk gun hĭ bruă či ba tuai nao pơ Dak Nông hơđăp, yua kơ jơlan ataih aka ƀu hiam ôh laih anun ƀing tuai hyu ngui aka ƀu kiăng nao, yua mơ̆ng Mũi Né nao truh pơ Dak Nông lĕ đĭ rơdêh sui truh 10 mông kah truh. Ƀing ta kiăng pơjing jơlan rô nao rai ber hloh, ƀiă mông pơgiăng tuai, ƀudah tơdơi anai, lơ̆m Mũi Né pơđĭ kyar hơmâo rơdrŏn rơdêh por, amra pơgiăng tuai mơ̆ng Mũi Né, nao pơ Đà Lạt, laih anun anun mơ̆ng Đà Lạt nao pơ Dak Nông amra tañ hloh”.

Hăng anŏ gêh găl hơmâo lŏn glai, ia rơsĭ, čư̆ siăng, dơnao pơprong, kông ngăn gru grua hiam lu, tơring čar Lâm Đồng hlăk pơtong glăi anih či nao ngui hiam mơak ñu phara hơjăn. Khă tui anun, kiăng lir hơbit tong ten truh kih, bruă pơhno nao rai gơnam sĭ mơdrô,anih anom tuai čuă ngui lĕ ăt khom ngă kơ ƀing khua mua mơnuih git gai wai lăng hơdôm anih tuai čuă ngui tong ten hloh. Kơ-iăng nai tha prin, nai prin tha Phạm Thị Huyền-Sang hră gưl prong Bơwih ƀong huă gah mơnuih ƀôn sang Hà Nội lăi pơhmu tui anai: Lâm Đồng ră anai, ƀu kơnong hơmâo 1 ƀudah 2 bơyan đôč ôh, dŏ hơmâo truh 4 bơyan”. Ngă hiư̆m pă kiăng ĕp ƀuh anih kơtang, lăp djă pioh anŏ kơđŏm glăi hrom, brơi tuai hyu ngui nao pơ Lâm Đồng dưi găn rơgao dŏ glăi mơak hlom bom.

“Bruă mơ̆ Lâm Đồng phrâo amra či ngă anun lĕ lir hơbit abih bang aŏ hơgĕt mơ̆ ƀing ta hơmâo lăi pơthâo pioh pôr brơi kơ ƀing tuai thâo. Tui hăng kâo pơmin lĕ, jơlan glông nao rai ƀơi Lâm Đồng aka pơtruh nao rai abih ôh, ngă kơ bruă ba hyu tuai pơtruh ƀoiw 3 boh tơring čar hơđăp dŏ tơdu đơi. Khom ngă hiư̆m pă kiăng hơmâo sa boh Lâm Đồng đôč, pơhrua nao 3 boh Lâm Đồng kah hăng tơ tă anai”.

Kiăng pơsir hĭ tơlơi tơnap kơ jơlan glông nao rai pơtruh hăng djop kual tuai čuă ngui amăng tơring čar, Lâm Đồng hlăk rơkâo hăng gơnong dlông khom pơkă, bruă čuk pơkra jơlan rơdêh đuăi hmar mơ̆ng Ngŏ nao pơ yŭ pơtruh nao rai mơ̆ng Phan Thiết-Bảo Lộc-Gia Nghĩa. Ơi Phạm Văn Mạnh, Kơ-iăng khua Gơnong bruă Man pơdong tơring čar Lâm Đồng brơi thâo:

“Ră anai, Ding jum man pơdong dong yua biă mă bruă anai. Kơnong kơ bruă čuk pơkra glăi jơlan prong nao rai mơ̆ng Gia Nghĩa hăng Di Linh laih anun jơlan prong 28B, ră anai jơlan anai hlăk pơkra glăi; jơlan mơ̆ng Di Linh nao pơ Gia Nghĩa hlăk rơkâo gơnong dlông jao brơi ngă tui hơdră sui thun man ƀrô kiăng ming pơkra glăi. Ƀơi anăp lĕ, ƀing gơmơi rơkâo tơring čar brơi prăk ming pơkra glăi kiăng rô nao rai amuñ ƀiă, gêh găl kơ tuai hyu ngui”.

Hrŏm hăng tuh pơ alin čuk pơkra jơlan nao rai, anom bruă čơkă tui tơring čar Lâm Đồng ăt hlăk dăp hơdră anăp nao kơ sa bruă mă phun ba tuai hyu ngui djop anih, ngă hơđong na nao laih anun pơblih kơtang. Ơi Nguyễn Văn Lộc, Khua Gơnong bruă Gru grua, Pơrơguăt drơi jăn hăng Tuai čuă ngui tơring čar Lâm Đồng brơi thâo, anom bruă tuai čuă ngui hơmâo akŏ bruă ba yua anŏ gêh găl hăng boh tŭ yua pơhno nao rai mơ̆ng tơring čar Lâm Đồng amăng rup lơkak amăng dêh čar ta.

“Ƀing gơmơi amra pơphun lu bruă mă kiăng găn rơgao, sa anih nao truh pơ klâo kual amăng tơring čar Lâm Đồng. Laih dơ̆ng, akŏ pơjing tuôr, jơlan pioh kơ ƀing tuai hyu ĕp lăng phrâo či pơtruh nao rai plah wah 3 kual; lăi pơthâo jơnum min mơnuih ƀôn sang tơring čar, khua mua apăn bruă phun ping gah tơring čar brơi ngă hră pơtrun kơ pơđĭ kyar bruă tuai čuă ngui mơ̆ng thun 2025-2030 hăng lăng nao pơ anăp adih truh thun 2045”.

Hơdôm yak rơbat djơ̆ lăp amăng bruă pơkă hnơ̆ng, lir hơbit pơtruh nao rai amăng kual hăng anăp nao pơđĭ kyar pơkra ming gơnam sĭ mơdrô kơ tuai čuă ngui phara hơjăn, brơi ƀuh tơlơi hrưn đĭ kơtang amăng bruă ba tuai čuă ngui amăng tơring čar Lâm Đồng. Mơ̆ng anun, kiăng lăi pơtong, anih anom gêh găl brơi kơ tuai hyu ngui ñu phara biă mă amăng rĭm boh tơring čar kiăng găn rơgao nao rai ba tuai hyu ngui.