Hăng anăn ñu “Por đĭ hăng dlông rơngit”, Hrơi jơnum ngui Khing khí cầu Dak Lak 2025 pơphun mơ̆ng lơ 1/5 – 3/5 ƀơi să Krông Na, tơring glông Buôn Đôn. Hrơi jơnum ngui hmâo 10 bôh Khinh khí cầu por brơi tuai čuă ngui lăng ƀơi Buôn Đôn hăng 2 bôh khinh khí cầu pơdah prưng ƀơi Tơdrŏn lak 10/3, plơi prong Buôn Ma Thuột.

Nua hră blơi kiăng ngui khinh khí cầu ƀơi Buôn Đôn lĕ mơ̆ng 140.000 – 800.000 prăk. Rim tal por ngui mơ̆ng 5-10 mơnit, ƀơi rơhuông adai dlông 50 mĕt. Hrŏm hăng anun tuai dưi lông lăng hơdôm bruă mă bơkơtuai bôh thâo đưm, adôh suang tui phiăn juăt, lăng hơdôm gơnam pơdă gơnam ƀong huă ƀơi plơi pla.

Ơi Phạm Trung Nghĩa, Khua Jơnum min mơnuih ƀôn sang tơring glông Buôn Đôn brơi thâo, jơlan hơdră lu anung prăk yua por khinh khí cầu pơplih nao rai pioh tuai ruah mă tơlơi lông lăng. Bruă mă yua kơ anom hmâo tơlơi găn rơgao amăng bruă por khinh khí cầu gơgrong pioh pơhlôm hơdôm tơlơi pơkă kơ bruă mă yua, pơhlôm klă hăng hơđong hăng tuai čuă ngui:

“Anai lĕ tal blunga sa tơlơi jơnum ngui prong hăng hơdôm hơdră găn rơgao lông lăng phara hăng khinh khí cầu dưi pơphun ƀơi plơi pla. Tơlơi anai ƀu kơnong kơ hmâo tơhnal ngui ngor ôh mơ̆ ñu dô̆ jing jơlan tô nao rai pioh lăi pơhưč bôh thâo đưm, tơhnal gal tuai čuă ngui, biă ñu gru grua bôh thâo đưm djop djuai ania Dap Kơdư hăng gơyut gơyâo mơ̆ng lu anih. Ƀing gơmơi pơmin, hăng tơlơi anăp nao mơ̆ng mơnuih ƀôn sang hăng tuai čuă ngui, Hrơi jơnum ngui khinh khí cầu tơring glông Buôn Đôn amra jing sa gru nam pơđom pioh lăp hơdor biă, djru ngă brơi Buôn Đôn jing anih anom ngă pơhưč pran jua tuai čuă ngui amăng hla kak Việt Nam”.

Rơngiao kơ anun, tuai čuă ngui nao pơ̆ Dak Lak amăng tal pơdơi lơphet lơ 30/4 hăng lơ 1/5 thun anai dô̆ dưi lăng ƀuh hăng lông lăng hơdôm bruă mă bôh thâo đưm, bơkơjăp drơi jăn ngă pơhưč pran jua pơphun ƀơi plơi pla, kah hăng pơdah bôh thâo čing hơgor, adôh suang ƀơi jơlan glông amăng plơi prong, pơdă prưng rup, gơnam ƀong huă djop djuai ania.. Ơi Trần Hồng Tiến, Khua Gơnong bruă bôh thâo đưm, bơkơjăp drơi jăn hăng tuai čuă ngui tơring čar Dak Lak brơi thâo:

“Hơdôm bruă mă anun pơphun amăng 4 hrơi pioh tuai čuă ngui nao lông lăng. Rơngiao kơ čuă ngui tơhrơi, amra nao pơ̆ Biuôn Đôn, Lak ƀudah sa dua anih anom čuă ngui, lông lăng khinh khí cầu lĕ mơlăm mơmot ƀudah hơdôm hrơi dô̆ glăi amra hyu čuă lăng gru grua bôh thâo đưm kơphê, tơlơi adoh suang Dap Kơdư hăng čuă lăng hơdôm gru pơđom pioh, anih anom hiam amăng tơring čar. Hơdôm gơnam anai ƀing gơmơi hmâo gum hrŏm hăng hơdôm bôh anom bơwih ƀong pioh pok pơhai”./.