Tơlơi ngă yang akŏ bơyan puih ƀrô blan Bơrơmi ria lĕ ngă yang bơni kơ Adai lŏn tơnah, bơni kơ khul yang rơbang laih anun atâo rơnuk ơi yă đưm đă ră hlâo hơmâo akŏ pơdong plơi pla lŏn ia laih anun djru brơi kiăng hlim rơnang phang mơak, dêh čar hơđong, mơnuih ƀôn sang rơnuk rơnua, ngă pưk rơnang ngă sang prong, pơdai jor kơtor lu. Mông ngă yăng anai yua grup juăt ngă yang, iâu lăi tơlơi phiăn gru grua đưm Đội tế Nam quan pô ngă, tui tơlơi phiăn juăt, pơyơr boh čroh, bơnga hăng čuh ñang ƀâo bơngưi brơi kơ atâo ơi yă đưm đă.

Ƀing khua mua nao jơnum laih anun ană plơi pla mut hrŏm ngă yang, giong iâu lăi, čuh ñang h’ŭ, pơdah rai pran jua hơdor tơngia, bơni kơ atâo yang ơi yă anong wa đưm adih, rơkâo kiăng hơmâo ia hơjan klă, ngă hmua hơđong, bơwih ƀong huă jơnap, pơgăn hĭ rơbŭ kơthel, grŏm kơmlă, tal tlă ngă sat kơ mơnuih, kiăng kơthel pưh nao hmar, ia huăi ling dăo, tañ abih, pioh kơ mơnuih ƀôn sang dŏ amăng pưk rơnang, amăng sang hơđong. Tui hăng yă Võ Thị Phượng, Khua sang bruă djă pioh gru grua đưm tơring čar Dak Lak, bruă ngă anai kiăng djă pioh, pơđĭ gru grua hiam thâo pơpŭ kơ bơngăt jua, laih dơ̆ng kiăng lăi pơthâo anih anom gru grua anai, gru phun lir hơbit bruă pơđĭ kyar čơkă tuai hyu ngui mơak pran jua tơlơi hơdip amăng bơngăt ƀơi tơring čar.