Hlâo či ngă yang, hrŏm hăng prăp lui gơnam ngă yang, pô hmua iâu abih bang ƀing tha, čơđai amăng plơi gum sang anŏ ñu tơjŭ pơdai. Sang anŏ pô hmua prăp lui pơjeh pơdai, pơjeh kơtor, pơjeh get, dian, pơjeh trong, pơhăng. Kơ gơnam ngă yang, tui hluai kơ rim sang anŏ mơn, đa ngă yang hăng bui, đa mơnŭ, hăng tơpai čeh. Mơnuih amăng plơi nao djru lĕ djă ba đing tơjŭ.

Amĭ Nư dŏ pơ să Ea Wer, tơring čar Dak Lăk brơi thâo, ngă yang tơjŭ pơdai jing tơlơi yôm biă mă amăng gru grua hơdip mơda mơ̆ng djuai ania M’nông, pơdah tơlơi gum pơgôp mơ̆ng ană plơi:“Tơdơi kơ čuh rơmet abih đang hmua, sang anŏ prăp lui tơjŭ pơdai laih. blung a lĕ ta prăp lui pơjeh pơdai hiam, giong anun hyu iâu sang anŏ iao gah djru tơjŭ. Tơdơi kơ ngă yang giong lĕ ƀing đah rơkơi tlâ̆o amăng, ƀing đah bơnai kiăo tui tlôn tơjŭ. Tơdơi kơ ha hrơi tơjŭ, sang anŏ tơnă asơi hơbai añăm iâu abih bang huă asơi, mơñum tơpai. Sang anŏ hlơi hlơi lêng kơ hnun soh yơh, kar hăng ra bơblĭu. Tơdơi kơ pơdai tơsă arăng hơpuă pơdai arăng iâu bơbrum tui anun dong mơn”.

Mơguah mơguah, pô sang ruah sa blah hmua hăng kơdư, rơmet agaih či ngă anih ngă yang. Rơngiao kơ hơkă pioh pơjeh pơdai, hơmâo čeh tơpai hơkăt lui, bơbă ia laih, sa drơi mơnŭ čuh lui ƀhiao laih, sa gŏ asơi điơ̆, hrŏm hăng ačong, gai tơjŭ, đing tơjŭ. Pô sang pơphun phai yang yơh. Tơlơi phai yang anai lăi pơhmư̆ kơ yang čư̆, yang glai, yang đang hmua, čang rơmang yang brơi hơjan klă angin rơnang, brơi sa bơyan pơdai mơboh jor kơtor mơboh lu. Phai yang giong, pô sang pro pơjeh pơdai amăn đing, tlâ̆o amăng hăng tơjŭ pơdai. Giong anun dong, neh met wa amăng plơi tơjŭ kiăo tui klôn. Amĭ Ly ƀơi să Ea Wer, tơring čar Dak Lăk brơi thâo, tơlơi phiăn mơ̆ng djuai ania M’nông hơmâo mơ̆ng đưm laih:“Đưm adih ta kơnang kơ hơjan hlim đôč yơh, ƀu hơmâo kmơk pruai anun jing tơdơi kơ čong jơnah jah glai giong arăng lêng kơ tơjŭ pơdai mơ̆ng 2 truh kơ 3 thun, tơdơi kơ lŏn ñu krô, ƀu hiam dong tah, jing arăng nao ngă pơ pơkŏn dong, ngă năng ai 3 thun lĕ pơwơ̆t glăi pơ hmua hơđăp dong, ƀu djơ̆ phă glai prai rưng thim či ngă hmua ôh. Ră anai đang hmua arăng pla rơtă, kơtor, tơbâo, bơ pơdai lĕ arăng ngă pơdai ia đôč, neh met wa plih lu laih, kiăo tui tơlơi phiăn mơ̆ng kơnuk kơna ƀu čong jah glai dong tah, samơ̆ tơlơi phiăn ngă yang đang hmua lơ̆m truh bơyan tơjŭ pla arăng ăt dŏ ngă mơn, ngă tui đưm mơtăm”.

Pơđut ha hrơi mă bruă glêh glar pơ hmua, wơ̆t pô sang hăng ƀing kiăo tui djru amra ƀong huă, mơñum tơpai, ngui ngor, adoh suang, pơƀuh tơlơi hơdip rơnôm, thâo gum pơgôp, djru nao rai tơdruă. Rơnuk anai, rim thun ƀơi hơdôm boh plơi pla mơ̆ng djuai ania M’nông aset biă ñu ăt pơphun mơn tơlơi ngă yang anai amăng bơyan tơjŭ pla, pơƀuh pran jua thâo pơpŭ yang rơbang hơmâo brơi kơ ƀing gơñu sa bơyan hơmâo ƀong hơmâo huă./.