Tal pơdă rup anai, ba pơdă 180 mơta rup mơ̆ng 131 čô mơnuih čơphil rup amăng dêh čar, lăi nao tơlơi hơdip mơda, bruă mă, gru grua hiam hăng tơlơi phiăn juăt mơ̆ng 54 djuai ania Việt Nam. Lu rup anai hơmâo čơphil ƀơi djop anih amăng dêh čar, lăi pơthâo tong ten bruă mă tơlơi hơdip mơda gru grua, dŏ dong ƀong huă, tơlơi mă bruă, đăo kơ yang rơbang hăng gru eng ao buh mơ̆ng djop djuai ania.

Tui hăng yă Trần Thị Thu Đông, Khua khul čơphil rup Việt Nam, tal pơdă rup anai jing boh tơhnal jak iâu amăng dêh čar mơ-it rup pơplông, ruah mă tong ten mơ̆ng 4000 pok rup mơ-it nao. Anai ƀu kơnong bruă ngă gah tơlơi hiam hơ̆k hơr đôč ôh, dŏ djru pôr pơthâo rup raop lŏn ia, ană mơnuih Việt Nam hăng tuai rơnguai thâo. Kơnang mơ̆ng hơdôm pok rup anai, khul khua mua pơphun pơdă rup čang rơmang ngă bang bơngač hloh gru grua, pơđĭ tui tơlơi thâo hluh djă pioh hăng pơđĭ tui anŏ hiam mơ̆ng djop djuai ania amăng tơlơi hơdip rơnuk phrâo. Tal pơdă rup anai truh kơ 6/4 pơ anăp pơđut.