Glăk dŏ rơmet anih pla bơnga ƀơi anăp sang, amai Y Doan brơi thâo, pral lui hrơi hơdor akŏ pơjing Kơnuk kơna lơ 2/9, mơnuih djuai ania Sêdang ƀơi Kon Jong hơmâo prap lui djop kiăng čơkă tuai čuă ngui. Mơng hrơi pơlir hơbit anom bơwih ƀong hrŏm Ngă hmua bơwih brơi tuai čuă ngui Ngọk Réo, neh met wa thâo wai lăng jum dar agaih rơnăk, djă pioh gru grua anun lĕ čing hơgor, tơlơi adôh suang, đing nao bruă kŏng tơpai čeh, tơnă hơbai añăm ƀong djuai ania pô….brơi kơ tuai čuă ngui. Amai Y Doan brơi thâo:

“Ƀing gơmơi hơmâo prap lui djop mơta hơmâo tơpai čeh, asơi huă añăm ƀong, ia mơñum brơi kơ tuai lơm rai čuă ngui ƀơi anai. Ƀing gơmơi amra bơwih brơi djop mơta kiăng kơ tuai hok mơ-ak hloh amăng hrơi akŏ pơjing kơnuk kơna lơ 2/9 anai, kiăng kơ tơdơi anai ƀing gơñu amra hơdor kơ ƀing gơmơi, tuai rai ngui ha wŏt amra rai tal dua, tal tlâo dong”.

Pioh čơkă tuai, amai Y Hoa hrŏm hăng adơi amai amăng plơi pla hơmâo dưm dăp, tol yol lu gơnam ƀơi anih bơwih brơi tuai čuă ngui čroh ia Đắk Lôi. Ƀơi ania hơmâo lu gơnam OCOP mơng ƀon lan, anun lĕ ia hơni , rơbung krô, kơphê…hăng yôm hloh lĕ tơpai čeh-gơnam yôm phara ƀơi Kon Jong. Amai Y Hoa brơi thâo, blung hlâo ñu kŏng tơpai kiăng kơ sĭ brơi mơnuih ƀôn sang amăng kual anai. Tơdơi anai hơmâo lu mơnuih rơkâo amăng plang mơnuih mơnam, laih dong anih tuai čuă ngui pok rai, bruă kŏng tơpai čeh jing sa amăng hơdôm bruă ba glăi pơhhrui lu brơi ƀing đah kơmơi amăng plơi pla. Amai Y Hoa, khua grup ngă hrŏm kŏng tơpai čeh Kon Jong hok mơ-ak lăi pơthâo ia tơpai čeh jơman ngă lu mơnuih hor mơñum:

“Kiăng bơiwh brơi kơ tuai klă hloh, kâo kŏng tơpai tui jơlan gah djă pioh ia jơman tui gru grua, hăng pơhlôm gơnam mơñum hơdjă, hơmâo anăn apăn hlao. Mơng hrơi kŏng tơpai kâo ƀuh anai ƀu djơ̆ kơnong ba glăi pơhrui amăng tơlơi bơwih ƀong đôč ôh, ăt pơhưč lu adơi amai amăng plơi pla kŏng tơpai. Ƀing gơmơi hơmâo pok prong pla pơdai điô̆, anai lĕ braih pơdai juăt yua lơm kŏng tơpai čeh brơi kơ tuai čuă ngui”.

Kual čroh ia Đắk Lôi, să Ngọc Réo, hơmâo lu pơtâo pơprong, ter hang dua bơnah hơmâo kyâo pơprong ngă hơ-iu rơ-ơ̆ djop bơyan, lăng hyu hiam biă mă. Anai lĕ anih hơmâo gong gai ƀon lan dưm dăp ngă anih čuă ngui. Hăng tơlơi gum djru mơng kơnuk kơna, neh met wa gum hrŏm akŏ pơjing anom bơwih ƀong hrŏm Ngă hmua bơwih brơi tuai čuă ngui Ngọk Réo, pơdong hơdôm hơpluh sang liang, pok anih pơdă gơnam ta sĭ brơi kơ tuai.

Ayong A Thảo, Khua git gai Ping gah plơi Kon Jong brơi thâo, bơwih brơi tuai čuă ngui amăng plơi pla pok rai jơlan gah phrâo hăng mơnuih djuai ania Sêdang. Ră anai lĕ Khua anom bơwih ƀong hrŏm Ngă hmua bơwih brơi tuai čuă ngui Ngọk Réo, ayong A Thảo brơi thâo: tơlơi truh kih prong hloh mơng hơbô̆ bruă anai lĕ djru brơi neh met wa pơplih tơlơi pơmĭn, bruă mă, mơng tơlơi hơdip truh bơwih ƀong huă rĭm hrơi.

“Sit biă ñu amăng ƀon lan, kâo pơphun pla anah bơnga, phun kyâo hăng jao brơi rĭm boh sang anŏ pla rôk tui jơlan glông hăng jum dar sang. Ƀơi čroh ia Đắk Lôi ăt pơphun na nao bruă rơmet pơagaih, pla phun kyâo, pơdong sang liang hăng rơkâo gưl glông djru prăk kak kiăng kơ man pơkra. Truh ră anai neh met wa amăng plơi pla mut hrŏm anom bruă bơwih brơi tuai čuă ngui ƀơi čroh ia Đắk Lôi, hăng hơmâo laih 20 čô ding kơna”.

Nao čuă ngui ƀơi čroh ia Đắk Lôi bơyan anai, tuai čuă ngui dưi hyu amăng glai kyâo rơ-ơ̆ mơ-ak, pel ĕp gru grua, añăm ƀong mơng djuai ania Sêdang. Glai rưng hiam mơtah hăng gru grua yôm phara glăk djru brơi mơnuih djuai ania Sêdang ƀơi Kon Jong, Ngọk Réo, Quảng Ngãi jing trơi pơđao.