Mơ̆ng đưm đă ră hlâo, neh met wa djuai ania Chăm đăo Islam Bà Ni pơphun ngă yang Kareh – Katal, jing ngă yang prô̆ tơdăm prăm dra, pơmut đăo kơ ană dăm ană dra lơ̆m truh 15 thun. Anai jing tơlơi ngă yang yom biă amăng tơlơi hơdip mơnuih djuai ania Chăm đăo Islam Bà Ni.

Ngă yang Kareh-Katal hơmâo ngă amăng 3 hrơi. Hrơi tal sa, abih bang mơnuih amăng sang prăp lui eng ao, pơdong anih či ngui, ngă yang. Hrơi tal 2, gơñu prăp gơnam kah hăng boh pơtơi, ƀañ asơi điơ̆ pơđuh, ƀañ it, ƀañ xalam…laih anun tơlơi ngă yang pơphun amăng tal 3.

Ƀrô tal anai, pô sang iâu abih bang neh met wa amăng plơi nao lăng hrơi ană dăm ană dra hơmâo yang yap ba, pơsit jing mơnuih prong kjăp tơlơi pơmin laih. Tui hluai kơ rim sang anŏ mơn, ta dưi pơphun prong ƀudah anet. Juăt ñu sang anŏ prăp lui rim čô mơnuih ha rơsi pơtơi, sa jam pioh asơi điơ̆ pơđuh laih anun sa drơi mơnŭ ông či ngă yang.

Tui hăng sa čô khua đăo ƀơi plơi Bình Thắng, să Bắc Bình, tơring čar Lâm Đồng, hlâo či ngă yang prong, khŏm ngă yang Mbang Aluah ƀơ̆i, jing yang lăi pơthâo hăng Pô Nabi - yang thâo hrơi anai pô sang hơmâo ngă yang truh tơdăm prăm dra brơi ană bă ƀing ñu.

Truh yang hrơi dơdrim, ƀing hlăk ai tơdăm dra pơƀut ƀơi anih ngă yang. Ƀing tơdăm yua sa čô khua đăo iâu lĕ “Imem” pơtô brơi mut nao dŏ amăng anih rơnưh anai. Ƀing dra hơmâo yă “Amuk Buh” pơtô nao dŏ rơnưh pơkŏn. Truh mơguah hrơi tơdơi, yang hrơi phrâo ƀlĕ, ƀing mă ƀuai brơi tơdăm dra anai mơ̆ng ha čô ba nao tơdăm dra trun mơnơi rơčô akŏ ƀơi ia krông. Anai jing bruă yom biă mă amăng tơlơi yang prôh tơdăm prăm dra.

Djuai ania Chăm pơmin, ia krông amra rao rơgoh djel abih djŏp tơlơi sot sat, kar hăng jrao hơčih kơ ană mơnuih ta. Trun nao pơ ia, jing ta hơdor glăi anih amĭ ƀă yă pơjing ta, lăi pơthâo hăng yang rơbang, lŏn adai tơlơi hơdip mơ̆ng sa čô mơnuih prong yơh, kjăp tơlơi pơmin yơh.

Tơdơi kơ nao pơñŭ pơ ia krông, ƀing tơdăm dra ha wơ̆t dong hơmâo ba glăi pơ anih ngă yang. Pơ anai, pô phai sit nik pơanăn brơi ƀing tơdăm dra amăng tal anai. Anăn hơmâo pơanăn tui anăn yang mă ƀuai. Anun lĕ anăn hơmâo mă yua truh kơ djai ba mơtăm.

Kiăo tui dong lĕ bruă ngă yang “lok klĭ gôm ƀơi mơnong hiong” hăng ƀing đah rơkơi. Hlâo adih, tơlơi phiăn anai hơmâo ngă kiăo tui anăn arăng pia mơtăm yơh. Rơnuk anai, tơlơi phiăn hơmâo ngă pơ ala mă đôč kơ ƀing tơdăm.

Hăng ƀing đah kơmơi lĕ ngă yang čơkă ƀuk ƀuăn ƀu hơmâo ngă soh glăi hăng tơlơi đăo ôh.

Amăng mông ngă yang phun, sa čô mơnuih pi nô anet năng ai 8 blan truh kơ 1 thun, jing anăn tơčô pô sang ngă yang ƀudah amăng kơnung djuai či ngă yang, laih anun iâu anai lĕ anek Po La Dhi mut ngă yang.

Lăi nao kơ tơlơi ngă yang anai, Imem Kết dŏ pơ plơi Bình Thắng, să Bắc Bình, tơring čar Lâm Đồng brơi thâo: yua dah djŏp pô leng kơ dŏ amăng hlung amĭ soh yơh, yua anun amăng anih ngă yang phun, blung a lĕ ngă yang brơi pô anet anai hlâo, giong anun kah mơ̆ng truh ană bă pô sang: “Khŏm hơmâo nô anet anai yơh, yua dah anai lĕ tơlơi phiăn ơi yă mơ̆ng đưm laih. Pô anet anai lĕ đah rơkơi, ƀu djơ̆ đah bơnai ôh, mơ̆ng 7 -8 blan. Ta buh brơi sum ao tui tơlơi phiăn đăo. Juăt ñu ĕp ƀing ană đah rơkơi amăng kơnung djuai, tơdah ƀu hơmâo kah mơ̆ng tơña ană arăng pơkŏn”.

Mah ăt dŏ hơmâo mơn tơlơi phiăn pơkŏn amăng tơlơi ngă yang Kareh-Katal, samơ̆ pơhmu hăng hlâo adih pơplih laih, biă ñu ngă tañ ƀiă.

Ơi Lư Văn Xuống, sa čô mơnuih thun tha laih ƀơi să Bắc Bình, tơring čar Lâm Đồng brơi thâo: “Hlâo adih, ƀing hlơi mut hrŏm tơlơi ngă yang Kareh-Katal anai khŏm nao kơsăi ia mă akan pơ dơnao, mut amăng glai koh djuh. Tơdơi kơ abih hrơi ngă yang lĕ ƀing ñu ăt dŏ glăi djru kơ sang anŏ ngă yang mơ̆ng 7 truh kơ 10 hrơi. Mơ̆ng hrơi pơphun ngă yang truh kơ pơđut mơtăm, jing sui ha mơkrah blan, samơ̆ ră anai ta ngă tañ laih, amăng 3 hrơi đôč”.

Pơđut tơlơi ngă yang, ƀing nao ngă yang ƀong huă hrŏm. Ƀing tơdăm dra ƀơi anih ngă yang hơmâo neh met wa, kơnung djuai brơi gơnam pơpŭ mơn. Tui anun, mơ̆ng ngă yang giong, ƀing tơdăm dra sit jing mơnuih tui đăo Islam Bà Ni , jing mơnuih amăng kơnung djuai laih./.