Hơdor glăi hrơi Pơdŏng lŏn ia thun anai sui 4 hrơi, ayuh hiăng pơ-iă klă hiam, rơ-ơ̆. Anai lĕ tơlơi gal pioh tuai nao čuă ngui pơ̆ Khánh Hòa. Tui Gơnong bruă bôh thâo, bơkơjăp drơi jăn hăng tuai čuă ngui tơring čar, đơ đam tơring čar čơkă giăm truh 908 rơbâo wot čô tuai, đŏ rơbêh kơ 10% bơhmu hăng thun hlâo. Amăng mrô tuai nao pơ̆ Khánh Hòa, rơbêh kơ sa amăng 4 mrô tuai dô̆ glăi, tuai mơ̆ng dêh čar tač rơngiao đĭ ha mơkrah bơhmu hăng thun hlâo.

Rơnoh apah yua anih dô̆ glăi hmâo 80%. Hăng prăk pơhrui glăi giăm truh 1.000 klai prăk mơ̆ng tuai čuă ngui đĭ rơbêh kơ 25% bơhmu hăng thun hlâo, Khánh Hòa pơtŏng sit dong pran ngă pơhưč mơ̆ng anih anom bul ia rơsĭ ba jơlan hlâo đơ đam dêh čar, pioh glăi gru klă hiam amăng pran jua tuai čuă ngui amăng tal pơdơi lơphet hơdor glăi hrơi pơdŏng lŏn ia. Anai lĕ gru nam mơ-ak, brơi ƀuh tơlơi pơđĭ kyar bruă tuai čuă ngui mơ̆ng Khánh Hòa – Ninh Thuận lơm pơmut hrŏm./.