Neh met wa hăng hlăk dŏ hmư̆ anun lĕ, črăn hrip mă tơlơi adoh Jarai mơ̆ng Y Quân Mjâo pô adoh. Er tơlơi adoh anun sa jua adoh hiam mơak, kiăo tui er gông brô̆, laih anun sa tơlơi ră ruai kơ tơlơi hơdip mơda, bruă mă, kơ tơlơi khăp plơi pla mơ̆ng mơnuih ƀôn sang dŏ ƀơi kual giăm guai dêh čar Ea Sup, tơring čar Dak Lak.

Mơnuih kơhnâo adoh Y Quân Mjâo, juăt iâu ơi Khely, dŏ ƀơi Ƀôn A2, să Ea Sup, tơring čar Dak Lak. Ñu anih amĭ ƀă yă pơjing hăng prô̆ tơdăm prăm dra ƀa tơsâo thâo ngă hmua pla tơrong pơhăng ƀơi kual lŏn Ea Sup, lŏn hơmâo lu bơnga črih, bơnga sup, mơ̆ng ñu dŏ anet hơmâo găn rơgao amăng anih gru grua đưm djuai ania. Amăng mlam ngui ngor adoh suang, pĕ gông, ayup đing, adoh pơtưh tơdăm dra amăng blan bơrơmi ria, abih bang dŏ ƀơi adring sang, amăng lăm blŭk apui jă ƀơi tơpur hao hao ƀing tơdăm dra bơ ră ruai laih anun adoh pơtưh nao rai. Gơñu adoh pơtưh, bơră ruai bruă mă, bơni tơlơi hiam, ia rơgơi tơlơi kơhnâo, bơni kơ čư̆ čan, uan djrao, plao kmrơ̆ng, ia ania, čroh hnoh glai klô hiam mơak, truh pơ tơlơi khăp tơdăm dra, tơlơi gum pơgôp amăng plơi pla, mơnuih ƀôn sang pơ anai. Mơ̆ng tơlơi adoh anun, pơtrut pran jua ñu hor hăng khăp biă mă kơ tơlơi adoh đưm Jarai hơbai ta. Mơnuih thâo adoh Y Quân Mjâo lăi:

“Kâo thâo adoh đưm Jarai mơ̆ng anet mơtam. Hlăk kâo 15, 16 thun kâo thâo adoh yơh. Kâo adoh djop anih, pơpă kâo nao, nao pơ hmua hai, hyu amăng glai tŭ mơ̆n sit kiăng adoh adoh mơtam, hyu pĕ añăm amăng glai hnun mơ̆n. Tơlơi adoh Jarai ƀing gơmơi juăt adoh bơni kơ tơlơi hơdip mơda, bruă mă rim hrơi đôč”.

Ăt kah hăng  lu mơnuih thâo adoh pơkŏn, Y Quân Mjâo hrăm adoh Jarai lĕ, ñu hmư̆ laih anun čăng pioh. Mơ̆ng tơlơi adoh amuñ ƀiă, boh pia pơtưh ƀiă, ber hloh, giong anun, ñu hrăm hơdor pioh lu tơlơi pơtưh dlông hloh hăng lu er tơlơi adoh tơdăm dra, wơ̆t tơlơi adoh đai kăm thơ̆ng, khăm wăt….Đok ñu adoh hmư̆ mơak, rơnang blang, abih pran jua samơ̆ hmư̆ tơma amăng pran biă mă, pơƀuh hyu glai klô, kyâo pơtâo hing ang. Ñu thâo adoh lu tơlơi adoh hơđăp, tơlơi adoh đưm Jarai ră ruai kơ tơlơi khăp tơdăm dra, sa boh pia lu mơnuih juăt adoh hăng jĕ giăm biă mă. Ñu adoh rơnguă pran jua, pơdah rai tơlơi khăp tong ten rơkơi bơnai, hning rơngôt, hơdor glăi khul tơdăm dra amăng plơi, anih juăt hyu ngui, tơdron wang pai, glai kiă kơbao, plao puh prô̆. Ñu lăi, hơdôm tơlơi adoh bơni kơ tơlơi khăp tơdăm dra ƀu kơnong adoh hmư̆ er đôč ôh, kiăng lăi hơdră plĕ nao boh pơhiăp, tơlơi pơtưh, kiăng mơ-it kơ ƀing dŏ hmư̆ mưn amăng lăm pran jua anŏ hiam mơak, anŏ klă hnơ̆ng mơ̆ng tơlơi khăp tơdăm dra, bruă mă dŏ hrŏm tong ten amăng rim hrơi.

“Lơ̆m sa čô tơdăm khăp hăng hning kơ sa čô dra, ñu juăt mơ-it boh pơhiăp, tơlơi pơtưh adoh anun yơh: Kâo lăng tui ih. Lăng jĕ, ih hiam hrup bơnga, lăng ataih ih hiam hrup dra yang amăng tơring. Hning kơ ih, ayong huă ƀu hơđong, dong ƀu mơak, pit ƀu h’ĕt ôh. Ngă bruă wor rơbit na nao đôč. Amăng pran jua dŏ ƀuh na nao ih đôč. Kâo khăp tơlơi adoh hrup sa črăn pran jua kâo, kâo mơak na nao kiăng adoh tơ-ua tui truh pơ ataih adih, jơlan čư̆ siăng kriăng pơtâo hai ăt mơak nao pơ anăp, adoh na nao đôč”.

Hơdôm tơlơi adoh đưm Jarai yua kơ mơnuih kơhnăk adoh đưm Y Quân Mjâo pô adoh, ƀu kơnong ƀu mơnuih tha rơma đôč ôh hor hmư̆, lu hlăk ai tơdăm dra amăng plơi lêng kơ hor soh hmư̆. Sit hmư̆ ñu adoh, arăng kret kruai dŏ đing hmư̆, pơhưč lu mơnuih nao giăm, hlăk ai tơdam ngek dra muai hmel hmol dŏ jum dar hmư̆. Ƀu kơnong khăp kơ tơlơi adoh đôč ôh, ƀing hlăk ai dŏ pioh lu tơlơi khăp hăng pơpŭ biă mă kơ ñu. H’Thuyên Kpă, dŏ ƀơi ƀôn A2 lăi:

“Kâo hmư̆ ñu adoh đưm Jarai mơak biă mă, adoh hiam. Amăng ƀôn wa anun yơh juăt adoh hăng pơtô ba adoh, djop pô mơak soh hrăm tui tơlơi adoh ñu pơtô ba”.

Bơ ayong Y Nô Ksor, ƀôn A1, să Ea Sup, tơring čar Dak Lak lĕ lăi:

“Wa anun juăt adoh tơlơi adoh Jarai đưm, kâo hor hmư̆ biă mă. Wa anun adoh bơni kơ tơlơi hơdip  mơda, tơlơi khăp ƀing tơdăm dra, kâo hmư̆ mơak biă mă ăt aka ƀu thâo hluh lu lơi tơlơi pơtưh boh pia ñu. Kâo thâo ƀiă mơ̆n, anun kâo kiăng kơñ pơgi hlăk ai ƀing gơmơi amra hrăm adoh, ƀing čơđai anet ăt hrăm adoh Jarai đưm mơ̆n, kiăng djru hrŏm djă pioh gru ama grua amĭ plơi pla ta pô”.

Tơlơi adoh mơ̆ng mơnuih kơhnăk Y Quân Mjâo ƀu kơnong tơ-ua hyu amăng plơi pla đôč ôh, dŏ kiăo tui ñu hyu lu anih, pơdah amăng mông jơnum, ngui ngor, jơlan hơdră adoh suang prong amăng tơring čar hăng gah rơngiao tơring čar. Sit đĭ ƀơi tơrưng adoh suang, ñu djă ba er tơlơi adoh Jarai đưm, adoh kơ arăng hmư̆, lăi pơthâo rơnoh yom gru grua hiam djuai ania pô kơ lu mơnuih hmư̆ hăng dŏ lăng. Hăng tơlơi khăp pran jua hur har biă mă anun hăng tơlơi adoh đưm Jarai, er tơlơi adoh ñu adoh brơi amra dưi djă pioh, kiăng ba jua mơñi, er yŭ đĭ trun hiam mơak mut tơma amăng pran jua djop mơnuih dưi tơ-ua na nao amăng tơring tơrang glai klô čư̆ siăng Dap Kơdư ta.