VOV4.Jarai-Tlam lơ 15/3, ƀơi tơring kual Lộc Thắng, tơring glông Bảo Lâm, Lâm Đồng, Jơnum min Boh thâo ia rơgơi hăng anih hơdip jum dar mơ̆ng Anom bruă khua pơ ala mơnuih ƀôn sang dêh čar, hơmâo mă bruă hăng khua mua wai lăng anih mă eh pơsơi Bauxit nhôm Tân Rai tơring čar Lâm Đồng hăng Nhân Cơ tơring čar Dak Nông kơ bruă ngă tui tơlơi rơkâo mơ̆ng grup krăo lăng hăng boh tơhnal pơsir hĭ tơlơi aka ƀu găl tui hăng tơlơi rơkâo hlâo kơ anun.

Mông jơnum mă bruă bưp nao rai

Tui hăng hră lăi pơthâo mơ̆ng Group mă hơdăng pơtâo tuh tia pơkra pơjing –Ĕp mă dram gơnam amăng lŏn Việt Nam, amăng thun 2020, mah bưp lu tơlơi tơnap tap bơbeč djơ̆ mơ̆ng klin Covid 19 ngă samơ̆ abih dua boh sang măi eh pơsơi Bauxit nhôm Tân Rai hăng Nhân Cơ lêng kơ ngă bruă djơ̆ hăng akŏ bruă jao pơkă hlâo.

Grup krăo lăng mơ̆ng sang bruă pơ ala mơnuih ƀôn sang dêh čar nao ĕp lăng sit nik ring bruă pơsir ia hlŭ, ia djah ƀơi sang măi Alumin Tân Rai

Amăng anun, sang măi Tân Rai pơkra ming 707 rơbâo tơn alumin, prăk sĭ mơdrô pơhrui glăi 2.700 klai; sang măi Nhân Cơ pơkra ming 715 rơbâo tơn alumin prăk pơhrui glăi 2.900 klai hăng prăk kơmlai pơhrui glăi 29 klai. Kơ bruă pơgang ayuh hyiăng anih hơdip jum dar, hơdôm sang măi anai lêng kơ gir run pơkiăo nao khul mơnuih mă bruă pơsir hĭ sa hnong hơdră pơgăn anŏ hơƀak jrak anih hơdip jum dar mơ̆ng sang măi pơkra ming; ayuh hyiăng anih hơdip jum dar, kual glai kyâo ieo gah sang măi hlăk mă bruă bơblih hiam rơgoh hơdjă soh mơ̆n.

Pơhiăp klah čuh laih mă bruă bưp nao rai, grup krăo lăng mơ̆ng sang bruă pơ ala mơnuih ƀôn sang dêh čar rơkâo ăt khom ngă tui hơdôm tơlơi rơkâo mơ̆ng bruă krăo lăng pơgang ayuh hyiăng anih hơdip jum dar, boh nik ñu 3 mơta kơ bruă dơnao kong lui ia djah, hlŭ amruih hơdăng pơtâo hăng khom pla kyâo pơgang anŏ hơdjă glai klô jum dar sang măi Alumin Nhân Cơ.

Nay Jek: Pơblang