VOV4.Jarai - Mơguah lơ 29/3, ƀrô tal hơdor glăi 46 thun hrơi pơklaih rơngai ƀôn prong Đà Nẵng hơmâo lăi pơthâo hơdôm tơlơi pơtrun, tơlơi pơsit mơng Kơnuk kơna, Khua dêh čar amăng pơđĭ kyar ƀôn prong Đà Nẵng. Anun lĕ, tơlơi pơtrun pơphun ngă tui tơlơi pơsit mrô 119 mơng Khua pơ ala mơnuih ƀon sang dêh čar kiăng kơ pơphun ngă hơdôm hơbô̆ bruă gong gai ƀôn prong; tơlơi pơsit tŭ yap Akŏ bruă dưm dăp ƀôn prong; tơlơi pơsit bruă pơjing akŏ bruă tuh pơ alin man pơkra Tơdrun tum păn Liên Chiểu hăng Tơlơi pơtrun pơjing akŏ bruă Anom bruă prăk kak ƀôn prong Đà Nẵng.

Kơ-iăng khua dêh čar ta ơi Trịnh Đình Dũng jao tơlơi pơtrun pơsit mơng Kơnuk kơna, Khua dêh čar kơ bruă pơđĭ kyar ƀôn prong Đà Nẵng

Đĭ pơhiăp amăng mông ngă lơphet lăi pơthâo, Kơ-iăng Khua dêh čar ta ơi Trịnh Đình Dũng brơi thâo, Tơlơi pơsit mrô 119 mơng Khua pơ ala mơnuih ƀon sang dêh čar kiăng kơ pơphun ngă hơdôm hơbô̆ bruă gong gai ƀôn prong hăng sa, dua hơdră bruă yôm phun amăng pơđĭ kyar ƀôn prong Đà Nẵng lĕ kiăng biă mă. Anai lĕ hơdôm tơlơi pơtrun lăp djơ̆ djru brơi ƀôn prong dưi hrưn đĭ pơplih phrâo amăng bruă pơjing khul grup lăp djơ̆ hăng tơlơi gal kiăng pơđĭ kyar ƀôn prong Đà Nẵng.

Siu Đoan: Pơblang