VOV4.Jarai-Ƀơi sang jơnum khua pơ ala mơnuih ƀôn sang dêh čar, Khul pơphun ruah khua dêh čar jơnum abih bang ding kơna tal 3 yua kơ yă Nguyễn Thị Kim Ngân, Khua pơ ala mơnuih ƀôn sang dêh čar, Khua khul pơphun ruah khua dêh čar pô git gai.

Khul pơphun ruah khua dêh čar lăi pơthâo Hră pơtrun kơ mrô anih plĕ hră ruah khua, anăn djop anih ruah khua hăng mrô mơnuih ngă pô pơ ala mơnuih ƀôn sang dêh čar dưi ruah mơ̆ng djop sang bruă ƀơi tơring čar, ƀôn prong gah gơnong dlông. Khul ruah khua dêh čar pơsit mrô anih ruah khua pơ ala mơnuih ƀôn sang dêh čar tal 15 amăng dêh čar ta hơmâo 184 boh anih.

Ƀơi mông jơnum tal 3 mơ̆ng Khul pơphun ruah khua dêh čar hmư̆ lăi pơthâo boh tơhnal čih pơkra glăi tơdơi kơ jơnum pơčrông sai tal sa kơ dăp hơdră, ding kơna, mrô mơnuih ruah ngă pô pơ ala dêh čar tal 15 laih anun tơlơi pơhing mơ̆ng djop sang bruă, anom bruă ƀơi Gơnong dlông hăng tơring čar prăp lui jơnum pơčrông sai tal 2 pioh čih anăn jăng ja hơdôm mơnuih tơbiă anăn pioh ruah ngă pô pơ ala dêh čar, pơ ala djop gưl; lăi pơthâo tơlơi pơhing kơ bruă mơ̆ng Khul ruah khua dêh čar laih anun grup anet lăi pơthâo tơdơi kơ Jơnum Khul pơphun ruah khua dêh čar tal 2 truh ră anai; bơkơtuai glăi hơdôm hră lăi pơthâo hăng pơsit hĭ hră pơtrun kơ mrô anih ruah khua, anăn anom bruă ruah khua hăng mrô mơnuih ruah ngă pô pơ ala dêh čar mơ̆ng djop anih ruah khua amăng đơ đam dêh čar. Pơhiăp ƀơi mông jơnum, Khua git gai pơ ala mơnuih ƀôn sang dêh čar, Khua khul ruah khua dêh čar, yă Nguyễn Thị Kim Ngân brơi thâo:

“Hrơi blan mơ̆ng ră anai truh hrơi phuă glăi hră pơar ƀing tơbiă anăn pioh ruah ƀu lu dơ̆ng tah, anun khŏm mă bruă ječ ameč biă mă, kơđiăng tong ten ngă atur kjăp pioh pok pơhai rơđah rơđong amăng bruă git gai, pơčrâo bruă kơ dêh čar kiăng pơgang brơi mơnuih ƀôn sang, mơnuih plĕ hră ruah khua, mơnuih tơbiă anăn, ngă tui djơ̆ tơlơi dưi pô bơkơnar tui hăng tơlơi phiăn. Tal ruah khua amra pok pơhai pơgang rơnuk rơnua hơđong,ngă tui thâo pơkrem kơdeng hăng jing hrơi mơak prong kơ abih bang mơnuih ƀôn sang dêh čar ta thun 2021”.

Jơnum abih bang tal klâo Khul pơphun bruă ruah khua dêh čar

Hră lăi pơthâo ƀơi mông jơnum, ơi Trần Văn Túy-Khua grup wai lăng ƀing pơ ala, Kơ-iăng Khua Anom bruă wai lăng khua mua pơ ala brơi thâo: tơdơi kơ Jơnum pơčrông sai tal sa ƀơi Gơnong dlông, Khul khua mua Jơnum min Wai lăng djop djuai ania mơnuih mơnam Việt Nam hơmâo rơkâo hăng Khul pơphun ruah khua dêh čar, Jơnum min apăn bruă git gai pơ ala mơnuih ƀôn sang dêh čar ăt djă pioh mrô mơnuih pơ ala mơ̆ng Anom bruă wai lăng djop djuai ania mơnuih mơnam hăng hơdôm sang bruă gah anom bruă anai kah hăng mrô khua mua pơ ala mơ̆ng rơwang bruă tal 14 kiăng pơhlôm djop hăng pơđĭ tui tơlơi gơgrong ngă pô pơ ala mơnuih ƀôn sang amăng sang bruă khua pơ ala mơnuih ƀôn sang dêh čar, djơ̆ hăng anăp ngă jai hrơi pok prong tui sang bruă ngă ding kơna mơ̆ng anom bruă wai lăng djop djuai ania mơnuih mơnam Việt Nam; pơđĭ tui mrô mơnuih pơ ala jing mơnuih gah rơngiao ping gah kiăng djop mrô mơnuih plah wah ping gah hăng ƀu djơ̆ mơnuih ping gah; djop mrô pơ ala jing đah kơmơi lăi pơthâo tơbiă anăn ruah ngă pô pơ ala tal 15 boh ƀiă ñu 35% amăng mrô abih bang khua pơ ala; laih dơ̆ng ăt gleng nao kơ ƀing pơ ala mơ̆ng sang bruă bơwih ƀong sĭ mơdrô, mơnuih kơhnâo thâo hră, ƀing rơgơi kơsem min boh thâo phrâo, pơđĭ mrô pô pơ ala jing mơnuih djuai ƀiă tơbiă anăn pioh ruah ngă pô pơ ala ƀơi dêh čar.

Khua git gai pơ ala mơnuih ƀôn sang dêh čar yă Nguyễn Thị Kim Ngân đĭ pơhiăp ƀơi mông jơnum

Ră anai, djop anom bruă, sang bruă, anih mă bruă hlăk pok pơhai hơdôm yak ngă bruă, lăi pơthâo anăn mơnuih tơbiă anăn pioh ruah ngă pô pơ ala mơnuih ƀôn sang dêh čar tal 15 hăng ƀing pơ ala mơnuih ƀôn sang djop gưl rơwang bruă thun 2021-2026, hrơi blan pơkă truh lơ 11/3.

Tui hăng boh tơhnal pơkă lăng tơdơi kơ jơnum pơčrông sai tal sa, djop jơnum min pơphun bruă ruah khua tơring čar, ƀôn prong hơmâo laih hră lăi pơthâo djop mơnuih thâo amăng gong phun pôr tơlơi pơhing phrâo laih anun  mơ-it truh pơ djop anom bruă kơnuk kơna, djop tơring čar, tơring glông thâo hrơi mông, anih tŭ mă hră pơar čih anăn pô tơbiă anăn pioh ruah, laih dơ̆ng ăt lăi pơthâo hăng Khul pơphun bruă plĕ hră ruah khua gưl dêh čar.

Tơdơi kơ hmư̆ lăi pơthâo mơ̆ng grup anet pơpha bruă mă, Khua git gai pơ ala mơnuih ƀôn sang dêh čar, Khua khul pơphun ruah khua dêh čar, yă Nguyễn Thị Kim Ngân lăi pơtong, truh ră anai, bruă mă mơ̆ng hơdôm grup anet mơ̆ng Khul pơphun bruă ruah khua dêh čar ngă djơ̆ tơhnal bruă pơtrun; laih dơ̆ng rơkâo kơ anom bruă bơwih brơi Khul pơphun bruă ruah khua dêh čar tŭ mă hiăp pơgôp, ngă giong hăng mơit hră kơ djop anom bruă ngă ding kơna mơ̆ng Khul pơphun bruă ruah khua, djop sang bruă pơdjơ̆ hrom laih anun lăi pơthâo, pơtrut bruă krăp lăng pok pơhai ngă tui djơ̆ hơdră pơtrun.

“Rơkâo kơ hơdôm grup anet ngă bruă mơ̆ng Khul ruah khua dêh čar, Anom bruă bơwih brơi Khul pơphun ruah khua dêh čar, djop sang bruă gah kơnuk kơna, anom bruă wai lăng djop djuai ania mơnuih mơnam Việt Nam jŭ yap glăi hơdôm bruă kiăng ngă, tơlơi dưi, bruă mă hơmâo pơpha brơi laih, ngă giong tañ bruă prăp lui ruah khua, pơtrut, git gai tŭ mă hră pơar hăng boh yôm phun lăi pơthâo jơnum pơčrông sai tal 2 pioh čih anăn ƀing tơbiă anăn hăng tơlơi lăi pơthâo hlâo khŏm lăi pơthâo na nao kơ Khul pơphun bruă ruah khua dêh čar.

Kâo rơkâo djop sang bruă dăp hơdră hlâo pioh ĕp, lăng tui. Pơtrut kơtang bruă mă pôr tơlơi pơhing lăi nao kơ bruă ruah khua pơ ala mơnuih ƀôn sang dêh čar, khua pơ ala mơnuih ƀôn sang djop gưl amăng gong phun pôr tơlơi pơhing brơi mơnuih ƀôn sang hmư̆, ĕp lăng na nao tơlơi pơhing amăng plang internet kơnuk kơna dêh čar pơthâo brơi laih”.

Rơwang hrơi tơjuh rơgao, Khul ruah khua dêh čar hơmâo lăi pơthâo Hră pơtrun kơ mrô anih ruah khua, anăn djop anih ruah khua hăng mrô khua pơ ala mơnuih ƀôn sang dêh čar dưi ruah mơ̆ng djop anih anun ƀơi gưl tơring čar, ƀôn prong gah gơnong dlông. Tui hăng anun, mrô anih ruah khua pơ ala mơnuih ƀôn sang dêh čar tal 15 đơ đam dêh čar ta hơmâo 184 boh anih.

Nay Jek: Pơblang