VOV4.Jarai - Mơguah lơ 4/6 ƀơi Hà Nội, Kơ-iăng Khua dêh čar ơi Lê Văn Thành – Khua Grŭp črâo ba bruă pơgang, pơgăn ayuh hyiăng ƀu klă ngă dêh čar ta git gai jơnum lăng nao rai amăng tivi đơ đam dêh čar ta kơ bruă pơgang pơgăn ayuh hyiăng ƀu klă ngă hăng hyu ĕp hăng pơtlaih mơnuih hmâo tơlơi truh dêh čar ta thun 2021 ƀơi akô̆ phun pơ̆ Anom mă bruă Kơnuk kơna. Jơnum đing nao pơsit abih bang bruă pơgang pơgăn ayuh hyiăng ƀu klă ngă thun 2020, hluai tui hơdôm bôh tơhnal dưi hmâo, hơdôm tơlơi dô̆ glăi, tơlơi hrăm mơng tơlơi găn rơgao bruă črâo ba, git gai jơnum ba tơbiă bruă mă phun pioh kơ bruă pơgang pơgăn ayuh hyiăng ƀu klă ngă thun 2021. Kiăo tui anun, pok pơhai pơsit hơdôm jơlan gah ha amăng plĕ mơng bruă pơgang hlôm hlâo truh kơ bŏng glăi hăng hơkrŭ pơsir anô̆ răm rai kiăng plai ƀiă răm rai gah ană mơnuih hăng gơnam tam tui pran jua, pơdŏng khul mơnuih pơhlôm ƀơi anăp ayuh hyiang pơplih ƀu klă. Thun 2020, ayuh hyiăng ƀơi dêh čar ta hmâo truh ñet ba mơtăm hăng kơtang dong. Đơ đam dêh čar ta hmâo čih pioh 16 amăng mrô 22 mơta ayuh hyiăng ngă. Ayuh hyiăng pơplih ngă laih 357 čô mơnuih djai hăng rơngiă theng hăng abih bang răm rai gah bruă bơwih ƀong giăm truh 40 rơbâo klai prăk./.

Siu H’ Prăk: Pô pơblang