VOV4.Jarai-Mơguah hrơi anai, lơ 15/3, ƀơi Hà Nội, pok pơhai jơnum lok 54 Jơnum min git gai pơ ala mơnuih ƀôn sang dêh čar. Jơnum anai amăng ha hrơi, boh yôm phun lăi nao lĕ prăp lui jơnum lok 11 khua mua pơ ala mơnuih ƀôn sang dêh čar tal 14 laih anun bruă ruah khua pioh pơdah đĭ kơ ƀing pơ ala mơnuih ƀôn sang dêh čar ĕp glăi.

Ƀơi mông jơnum khua mua apăn bruă ping gah lok 2 tal 13 phrâo pơđut lơ 9/3, khua mua gơnong dlông plĕ hră ruah mơnuih ngă khua mir sir, khua dêh čar, khua git gai pơ ala mơnuih ƀôn sang dêh čar jing ƀing khua mua pơprong amăng kơnuk kơna dêh čar hăng mrô hră plĕ tŭ ư hrom lu.

Ding jum kơđi čar lăi pơthâo tơlơi pơgôp hiăp, lăi pơthâo anăn khua mua pơkŏn dơ̆ng pioh kơ ƀing pơ ala mơnuih ƀôn sang dêh čar ĕp lăng, ruah laih anun pơsit djơ̆ hăng Phiah phiăn hăng tơlơi phiăn dêh čar.

Ăt amăng tal jơnum lok 54 anai mơ̆n, Jơnum min git gai pơ ala mơnuih ƀôn sang dêh čar pơgôp hiăp kơ hră lăi pơthâo pơbut abih bruă mă ƀing pơ ala tal 14. Lăi pơthâo boh tơhnal ĕp lăng ngă tui hơdôm tơlơi pơtrun hăng pơsir hră mơnuih ƀôn sang ƀom kiơng mơit kơ khua mua pơ ala mơnuih ƀôn sang jơnum lok 10 tal 14, pioh pơƀut hĭ pơdah thâo jơnum lok 11, tal 14 pơsir dơ̆ng.

Nay Jek: Pơblang