VOV4.Jarai - Mơguah tom brơi (15/3), ƀơi Hà Nội, pơphun jơnum lok 54 mơng Jơnum min apăn bruă khua pơ ala mơnuih ƀon sang dêh čar. Pơgôp hiăp kơ črăn hră lăi pơthâo klah čun rơwang mă bruă tal 14 mơng Ƀirô khua pơ ala mơnuih ƀon sang, Jơnum min apăn bruă Khua pơ ala mơnuih ƀon sang mơng anun lăng glăi bruă lăi glăi tơlơi tơña mơng Khua mua lăp djơ̆ hăng tơlơi kiăng mơng mơnuih ƀon sang.

Tui hăng Khua pơ ala mơnuih ƀon sang dêh čar yă Nguyễn Thị Kim Ngân, rơwang mă bruă tal 14 mơng khua mua pơ ala mơnuih ƀon sang lĕ hiam klă, dưi ngă pơgiong truh kih bruă jao mơng Ping gah, mơnuih ƀon sang. Hăng 11 lok pơphun jơnum, rĭm blan Jơnum min apăn bruă Khua pơ ala mơnuih ƀon sang lêng kơ jơnum, wŏt hơdôm tal jơnum ječ lơ̆m hơmâo tơlơi hơget rung răng amăng lŏn ia hăng Kơnuk kơna kiăng kơ pơsir hĭ hmao tlôn. Khua pơ ala mơnuih ƀon sang dêh čar ta yă Nguyễn Thị Kim Ngân lăi pơtong bruă lăi glăi tơlơi tơña mơng Khua mua pơ ala mơnuih ƀon sang lăp djơ̆ hăng tơlơi kiăng mơng mơnuih ƀon sang.

Siu Đoan: Pơblang