VOV4.Jarai - Lom lơ 23/3, Grŭp hyu mă bruă mơng Grŭp apăn bruă Jơnum min djop djuai ania mơnuih mơnam dêh čar Việt Nam yua kơ Kơ-iăng Khua Jơnum min djop djuai ania mơnuih mơnam dêh čar Việt Nam Phùng Khánh Tài ngă Khua grŭp hmâo pel ĕp, lăng tui bruă prăp lui ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl, rơwang bruă 2021-2026 ƀơi tơring čar Daknông.

Tui hăng tơlơi lăi pơthâo mơng Jơnum min ruah khua tơring čar Daknông, truh ră anai bruă prăp lui ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 ƀơi tơring čar dưi pok pơhai tui djơ̆ tơlơi pơkă laih. Đơ đam tơring čar hmâo pơdŏng 2 Grŭp ruah khua pơ ala mơnuih ƀôn sang dêh čar hăng 14 Grŭp ruah khua pơ ala Jơnum min pơ ala mơnuih ƀôn sang tơring čar, 8 Jơnum min ruah khua Jơnum min pơ ala mơnuih ƀôn sang gưl tơring glông, 71 Jơnum min ruah khua Jơnum min pơ ala mơnuih ƀôn sang gưl să. Măng mông mă bruă hăng Jơnum min ruah khua tơring čar Daknông, Grŭp pel ĕp, lăng tui mơng Grŭp apăn bruă Jơnum min djop djuai ania mơnuih mơnam dêh čar Việt Nam pơtă Jơnum min ruah khua tơring čar khom hmao thâo, kơdŏng pơgăn hăng pơsir hơdôm tơlơi phrâo phun hmâo ƀơi anih mă bruă kiăng bruă ruah khua sit nik jing hrơi jơnum ngui mơng abih bang mơnuih ƀôn sang./.

Siu H’ Prăk: Pô pơblang