VOV4.Jarai-Grup khua mua mơ̆ng Jơnum min djop djuai ania mơnuih mơnam Việt Nam yua kơ ơi Phùng Khánh Tài Kơ-iăng Khua anom bruă djop djuai ania mơnuih mơnam Việt Nam, ngă khua grup nao mă bruă hăng khua mua tơring čar Lâm Đồng ĕp lăng bruă prăp lui ruah khua pơ ala mơnuih ƀôn sang dêh čar tal 15, khua mua pơ ala mơnuih ƀôn sang djop gưl rơwang bruă thun 2021-2026.

Jơnum min djop djuai ania mơnuih mơnam Việt Nam nao ĕp lăng

bruă mă ruah khua ƀơi Lâm Đồng

Lăng abih bang bruă prăp lui ruah khua ƀơi Lâm Đồng mơ̆ng gưl tơring čar truh pơ tơring glông, să dưi ngă djơ̆ tơhnal pơkă. Ping gah tơring čar, anom bruă khua mua mơnuih ƀôn sang, jơnum min mơnuih ƀôn sang tơring čar, Jơnum min ruah khua hơmâo pơphun pok pơhai ngă tui bruă ruah khua, kơsem min hơdôm tơlơi phrâo pơkă hăng rơwang bruă thun 2016-2021 kiăng pơphun klă hloh djơ̆ hrơi blan, djơ̆ anih, ĕp glăi jŭ yap tong ten djop mơta bruă.

Kơ-iăng khua Jơnum min djop djuai ania mơnuih mơnam Việt Nam ơi Phùng Khánh Tài čih pioh hăng pơtong glăi bruă ruah khua ƀơi Lâm Đồng. Anom bruă ping gah, khua pơ ala mơnuih ƀôn sang, jơnum min mơnuih ƀôn sang tơring čar khom čih hră pơtrun, ĕp lăng, pơphun jơnum djơ̆ hơdră, djơ̆ tơhnal pơtrun.

Lâm Đồng ăt khom lăng nao pơ anăp hăng sem glăi hrơi blan, anih anom bruă mă pơphun ruah khua ngă hiư̆m pă dưi tŭ yua klă hloh.

Nay Jek: Pơblang