VOV4.Jarai - Ƀơi Hà Nội, Ding jum kông ang pơphun Jơnum lăng nao rai amăng tivi hăng kông ang hơdôm tơring čar či klah čun, pơtŏng glăi bruă akŏ pơjing kông ang să, kông ang tơring kual apăn bruă arăng iâu chính qui ƀơi tar ƀar anih; pok pơhai akŏ pơjing Kông ang phường ngă bruă ba gru hlâo kơ tơlơi rơnuk rơnua hăng plơi prong rơgơi. Ngă tui tơlơi pơtrun mrô 22 lơ 15/3/2018 mơng Ding jum kơđi čar kơ bruă pơplih phrâo, dưm dăp anom bruă Kông ang ngă bruă hơdeč hmar, tŭ yua, truh ră anai, Kông ang ƀơi abih bang 63 boh tơring čar, ƀon prong hơmâo pơkiăo nao rơbêh 43 rơbâo čô kông ang apăn bruă nao ngă bruă ƀơi Kông ang să ƀơi rơbêh 7 rơbâo 800 boh să, tơring kual. Găn rơgao tơlơi tơnap tap blung a, tơhan Kông ang să, tơring kual apăn bruă amăng dêh čar ta hơmâo nao ngă bruă pơ plơi pla, dŏ hrŏm hăng ană plơi, pơtrut hyu tir, wai lăng rơnuk rơnua amăng plơi pla, mơng anun pơjing rai hơdră ngă bruă phrâo pơhlôm rơnuk rơnua hơđong ƀơi plơi pla, djru pơjing rai rup tơhan kông ang să yua lŏn ia wơr drơi pô, bơwih brơi mơnuih ƀon sang, abih bang yua tơlơi hơdip yâo mơ-ak mơng mơnuih ƀon sang.

Siu H’Mai: Pơblang