VOV4.Jarai-Tlam tom brơi, lơ 11/3, ƀơi anom bruă kơnuk kơna, ơi Nguyễn Xuân Phúc Khua dêh čar, ơi Trần Thanh Mẫn, Khua Jơnum min djop djuai ania mơnuih mơnam Việt Nam, git gai hrom, jơnum ĕp glăi bruă ngă tui Tơlơi phiăn hơdai gum hrom kơplah wah Kơnuk kơna hăng Anom bruă djop djuai ania mơnuih mơnam Việt Nam thun 2020 hăng pơčrông sai bruă mă thun 2021.

Pơhiăp ƀơi mông jơnum, Khua dêh čar rơkâo dua bơnah anom bruă ngă klă bruă pơtom hiăp, jak iâu mơnuih ƀôn sang gum pơgôp djop djuai ania, djop tơlơi đăo, mơnuih ƀôn sang Việt Nam dŏ pơ tač rơngiao. Ngă djơ̆ tơlơi gơgrong ba mơ̆ng mơnuih arăng đăo kơnang amăng kual plơi pla djuai ƀiă, ƀing apăn bruă khua pô pơtô djop tơlơi đăo.

Dua boh anom bruă ngă hrom klă bruă  pơkơtưn mă bruă, amăng anun pơkơtưn ngă bruă pok pơhai ngă tui Hră pơtrrun mơ̆ng jơnum ping gah dêh čar tal XIII. Ngă hrom pơtrut bruă ngă khua pô kơ djop mơnuih, djop anom bruă, khom thâo tơlơi kiăng mơ̆ng mơnuih ƀôn sang, akŏ pơdong ping gah, kơnuk kơna rơgoh, tơpă, pơgăn tơlơi hưp ham ƀong kông ngăn, pơgăn bruă ngă phak phai.

Nay Jek: Pơblang