VOV4.Jarai-Mơguah lơ 19/3, ding kơna ding jum kơđi čar, Khua anom pơphun bruă ping gah dêh čar ơi Phạm Minh Chính hrom hăng grup khua mua pơ ala mơnuih ƀôn sang dêh čar tơring čar Quảng Ninh, nao bưp mơnuih ƀôn sang ƀơi plơi prong Hạ Long. Lăng glăi rơwang bruă rơgao, mơnuih plĕ hră ruah khua ƀơi Hạ Long bơni mơ̆n bruă mă hăng tơlơi khăp, pran jua hur har, glăm ba mơ̆ng Grup khua mua pơ ala mơnuih ƀôn sang dêh čar ƀơi Quảng Ninh, jing ƀing pơ ala kơ mơnuih ƀôn sang biă mă, ngă pô pơtruh brơi tơlơi kiăng, tơlơi pơgôp hiăp mơ̆ng ană plơi pla truh pơ ƀing khua mua pơ ala mơnuih ƀôn sang dêh čar hăng djop sang bruă kơnuk kơna pơsir.

Pơđing hmư̆ tơlơi pơgôp hiăp mơ̆ng ƀing ruah khua, khua mua pơ ala, Khua anom pơphun bruă ping gah dêh čar ơi Phạm Minh Chính rơkâo, Quảng Ninh ăt khom ngă klă hơdôm bruă mă pơtrut bơwih ƀong huă mơnuih mơnam, pơgang hơđong tơlơi rơnuk rơnua dêh čar, kiăo tui jơlan tom ngă, djă pioh hăng pơđĭ tui ronoh yom gru grua hơmâo ƀơi tơring čar, pơtrut bruă ngă bơblih phrâo, bong tui djơ̆ hăng tơlơi gêh gal phrâo, laih dơ̆ng pơtum lu bruă ngă kơtưn đĭ kyar hơđong, tơlơi hơdip mơda mơnuih ƀôn sang ăt đĭ nao pơ anăp.

Nay Jek: Pơblang