VOV4.Jarai - Mơguah tom brơi (17/3), Khua dêh čar ơi Nguyễn Xuân Phúc git gai bruă jơnum lăng nao rai amăng tivi kơplah wah Kơnuk kơna hăng Grŭp Črâo ba pơgang, pơgăn klin Covid-19 dêh čar hăng 63 bôh tơring čar, ƀôn prong kơ bruă pơsit bôh tơhnal bruă pơgang, pơgăn klin hơdôm hrơi rơgao, črông sai hơdôm jơlan gah pơsir prong kiăng pơgang pơgăn klin ba glăi bôh tơhnal pơ̆ anăp. Pơhiăp amăng mông jơnum, Khua dêh čar ta ơi Nguyễn Xuân Phúc lăi rơđah, ƀing ta hmâo pơgăn ba glăi bôh tơhnal laih hơdôm tal klin lar hyu amăng mơnuih mơnam amăng sa thun, djơ̆ biă ñu lĕ 14 blan rơgao. Bruă pơgăn Covid-19 mơng dêh čar ta dưi hmâo jar kơmar pơsit yôm, dưi bơni amăng lu mông bơkơtuai, amăng măi mok pôr pơhing. Pơ̆ anăp anai, bruă wai lăng klin hluai tui lu bruă pơlar vaccine. Khă hnun hai, mrô kiăng yua vaccine blơi mơng dêh čar tač rơngiao dô̆ ƀiă hăng vaccine amăng lŏn ia pơkă hlâo khom truh 3 blan tal 4 thun 2021 Việt Nam mơng hmâo. Ƀơi anăp khom djă pioh ngă tui hơdôm bruă pơgang, pơgăn klin tui tơlơi pơtă 5 mơta, anai lĕ hơdôm bruă pơgang, pơgăn klin ƀu tơnap, pơkrem hăng ba glăi bôh tơhnal amăng rơwang ră anai./.

Siu H’ Prăk: Pô pơblang