VOV4.Jarai-Lơ 3/6, ƀơi anom bruă kơnuk kơna, gah yŭ kơ tơlơi git gai mơ̆ng ơi Phạm Minh Chính Khua dêh čar, Kơnuk kơna jơnum lok blan 5 thun 2021.

Ƀơi mông jơnum, Kơnuk kơna hmư̆ lăi pơthâo hăng pơcrông sai bruă pơhlôm, pơgang klin Covid 19; pơtong glăi tơlơi bơwih ƀong huă mơnuih mơnam, prăk kơnuk kơna 6 blan akŏ thun 2021 hăng hơdôm hơdră či ngă bruă 6 blan rơnuč thun 2021; pơtong glăi boh tơhnal ngă tui akŏ bruă tuh pơ alin mơ̆ng thun 2016-2020 hăng him lăng akŏ bruă tuh pơ alin mơ̆ng thun 2021-2025.

Pơhiăp ƀơi mông pơđut jơnum, Khua dêh čar ơi Phạm Minh Chính lăi, jơnum kơnuk kơna lok blan 5 pơphun amăng hrơi mông klin Covid 19 tơnap tap biă mă, hnong ƀă hyu kơtang, hmar hloh, djuai kman virus hŭi rơhyưt hloh laih anun ƀă hyu amăng kual tuh tia pơkra ming lu mơnuih dŏ pơtum, anih jơnum tơlơi đăo.

Khua dêh čar rơkâo ƀing khua mua nao jơnum pơčrông sai hơdôm tơlơi hơmâo hăng tơlơi tơpă, lăi pơthâo tong ten djơ̆ hăng tơlơi pơhing laih anun ngă tui lăp, hơmâo boh tŭ yua; mơnuih ƀôn sang tŭ ư hrom. Mơ̆ng anun lăng glăi tơlơi pơhing, bruă pơdah thâo ngă tui tŭ yua lu hloh pơ anăp anai.