VOV4.Jarai - Tlam lơ 15/3, ƀơi sang bruă Kơnuk kơna, Khua dêh čar ơi Nguyễn Xuân Phúc git gai jơnim khua mua Kơnuk kơna bơkơtuai kơ Tơlơi pơtrrun mơng Jơnum min apăn bruă pơ ala mơnuih ƀon sang dêh čar pơkôl pơkă prăk mă yua jơlan rơdêh pơđuăi hmar ƀơi anih dŏ gak jơlan pơđuăi hmar yua Kơnuk kơna ta pơkra. Lăi nao bruă mă prăk rơdêh nao rai hăng hơdôm kơčăo bruă yua Kơnuk kơna pơkra lĕ djơ̆ yua dah pioh tla hnưh, pioh pơkra ming...samơ̆ Khua dêh čar ơi Nguyễn Xuân Phúc pơsit, Kơnuk kơna tuh pơ alin pơkra jơlan rơdêh pơđuăi hmar ƀu kiăng ƀong lơi hơget ôh yua hnun bruă mă prăk rơdêh nao rai pơhlôm brơi prăk pioh tla hnưh čan, pioh pơkra ming jơlan đôč...Mơng bruă hơduah tơña ding jum, anom bruă, tui hăng Khua dêh čar, mông anai mơ̆ rơkâo bruă rơđah rơđông, amuñ bơbeč nao mơnuih ƀon sang hăng tơlơi bơwih ƀong lĕ kiăng pơtŏng glăi rơđah. Kơčăo bruă Tơlơi phiăn jơlan nao rai glăk čih pơkra ƀiă giong laih, yua hnun kiăng ba pơmut tơlơi anai amăng Tơlơi phiăn čih pơkra hlâo.

Siu H’Mai: pơblang