VOV4.Jarai - Ăt bơi mông pơphun jơnum lok 11 mơng Khua pơ ala mơnuih ƀon sang dêh čar tal 14 mơn, Khua dêh čar ơi Nguyễn Xuân Phúc hơmâo lăi pơthâo glăi bruă mă rơwang thun 2016 -2021 mơng Kơnuk kơna. Hăng tơlơi gơñăm nao “Akŏ pơjing kơnuk kơna pơđĭ kyar, mă bruă klă, mă bruă gir, bơwih brơi mơnuih ƀon sang”, rơwang bruă rơgao, Kơnuk kơna, Khua dêh čar hơmâo pơƀut git gai djŏp gưl, anom bruă ngă tui klă, dưm kơnar, tŭ yua djŏp tơlơi pơtrun, hơdră pơsir ƀơi djŏp bruă. Khua dêh čar ơi Nguyễn Xuân Phsc lăi, Kơnuk kơna khŏm dưi ngă pơđĭ kyar tơlơi bơwih ƀong, wai lăng bruă arăng pơđĭ nua gơnam ča čot, pơhlôm dưm kơnar abih bang, pơjing anih bơwih ƀong dưi pơđĭ kyar, lăng anai lĕ bruă yôm phun. Biă ñu, Kơnuk kơna, Khua dêh čar gir git gai ƀơi abih bang djŏp akŏ bruă, bruă ngă phun mơng Anom git gai pơgang hưp ham ƀong kông ngăn kơnuk kơna. Pơsir kơđi lu bruă, mă glăi lu prăk hăng dram gơnam; akŏ pơdong grup mă bruă yôm pơsir đut tơhnal lu tơlơi ngă ƀŏm, tơgŭ kơđi, kơđi tơnap, sui thun.

Siu H’Mai: pơblang