VOV4.Jarai - Tlam lơ 17/3, ƀơi sang bruă Kơnuk kơna, Khua dêh čar ơi Nguyễn Xuân Phúc tŭ jum Khua anih jưh dêh čar Philippines Meynardo Los Banos Montealegre, dua gơñu bơbưp, mă tơngan. Khua dêh čar ơi Nguyễn Xuân Phúc hơ-ơč kơ ơi Meynardo Los Banos Montealegre ngă Khua anih jưh pơ ala brơi dêh čar Philippines ƀơi dêh čar Việt Nam laih anun brơi thâo, hơdôm thun rơgao, tơlơi rô nao rai kơplah wah dua boh dêh čar klă hiam amăng lu bruă, biă ñu amăng bruă ƀơi ia rơsĭ. Khua dêh čar ta đăo gơnang kơ Khua anih jưh amra ngă bruă truh kih ƀơi Việt Nam. Khua dêh čar ta ăt brơi thâo mơn, Việt Nam ră anai glăk pơgang klin Covid-19 klă biă, laih anun tơlơi bơwih bong đĭ mơn.  Anai lĕ tơlơi gêh gal kiăng pơđĭ kyar bơwih ƀong huă mơnuih mơnam ƀơi Việt Nam. Việt Nam lêng lăng yôm tơlơi Ngă hrŏm yôm pơphăn hăng Philippines, amăng anun tơlơi ngă hrŏm bơwih ƀong gah ia rơsĭ lĕ yôm biă mă. Khua dêh čar ta kiăng dua boh dêh čar pơtrut hloh dong tơlơi sĭ mơdrô hăng tuh pơ alin.

Siu H’Mai: Pơblang