VOV4.Jarai - Khua dêh čar ta ơi Nguyễn Xuân Phúc git gai mông mă bruă hăng Khua git gai Ping gah ƀôn prong Hà Nội. Anai lĕ tal 9 amăng rơwang bruă anai Khua dêh čar git gai mă bruă, git gai hơdôm mông jơnum hăng Hà Nội kiăng hmư̆ lăng ƀơi anăp, črâo ba pơtlaih hơdôm tơlơi gun, tơlơi tơnap, djru ƀôn prong pơđĭ kyar kơtang hloh.

3 blan akô̆ thun anai, ƀôn prong ngă tui ba glăi bôh tơhnal dong “tơhnal pơkă nao hrom dua mơta bruă”, pơgang rah klin hăng pran jua “kơdŏng klin kah hăng kơdŏng glăi ayăt” laih anun pơtrut kơtang bruă bơwih ƀong huă sĭ mơdrô. Abih bang hơdôm tơhnal pơkă bơwih ƀong huă, sĭ mơdrô leng kơ dlông hloh bơhmu hăng sa tal. Pơhiăp amăng mông mă bruă, Khua dêh čar ta ơi Nguyễn Xuân Phúc lăi rơđah, Ping gah, Kơnuk kơna lăng ba biă tơlơi pơđĭ kyar mơng plơi prong jưh jom, hăng tơlơi anun dưi pơdah amăng bruă hơdôm hrơi rơgao hmâo hmư̆ hăng pơsir lu tơlơi rơkâo đĭ mơng Hà Nội. Gah bruă pơđĭ kyar Hà Nội pơ̆ anăp,  Khua dêh čar ta ơi Nguyễn Xuân Phúc lăi rơđah glăi bruă phun bơwih ƀong, bruă kơđi čar, bôh thâo, bơkơtuai jar kơmar mơng đơ đam lŏn ia, dêh čar ta anăp nao Plơi prong jưh jom. Yua anun, Hà Nội kiăng hrưn đĭ kiăng jing plơi prong jưh jom hơđong, klă hiam, kơjap kơtang wot pran jua hăng gơnam tam./.

Siu H’ Prăk: Pô pơblang