VOV4.Jarai - Lơ 21/3, tơring čar Long An hmâo pơphun ngă lơphet mă yua Kual sang măi tơdrông tum păn Phước Đông. Kual sang măi anai hmâo rơwang prong giăm truh 130 ektar, dŏng amăng anih jơlan nao rai gêh gal wot jơlan ƀơi rŏng lŏn hăng ƀơi jơlan ia, tô jơlan mrô 50, ƀôn prong Hồ Chí Minh hăng hơdôm bôh tơring čar kual Lŏn dăo ia krông Cửu Long.

Nao pơhmư̆ hăng đĭ pơhiăp amăng mông ngă lơphet mă yua, Khua dêh čar ta ơi Nguyễn Xuân Phúc čih djă pioh, pơsit yôm hơdôm tơlơi gir run, bôh tơhnal ngă pơhưč tuh pơplai hơdôm hrơi rơgao mơng tơring čar Long An. Khua dêh čar ta rơkâo tơring čar Long An khom ngă gal brơi, lăng ba, pơtlaih brơi hơdôm tơlơi tơnap, tơlơi gun kơ anom bơwih ƀong, pô tuh pơplai mă bruă, biă ñu amăng hơdôm hrơi klin Covid-19 ngă. Khua dêh čar ta rơkâo tơring čar Long An đing nao ngă tui tơhnal hmâo ră anai, pơlar djơ̆ hơdră kơplah wah kual plơi prong hăng plơi pla, khom pơsit hơdôm gơnong bruă măi mok ba jơlan hlâo hmâo yua hơbit pơđĭ kyar, đing nao pơđĭ kyar sang măi mă yua hơdră phrâo, măi mok djru gah tlôn. Hăng bruă đang hmua, đing nao mă yua hơdră măi mok phrâo kiăng pơđĭ tui tơlơi hơdĭ mơda mơnuih ngă đang hmua./.

Siu H’ Prăk: Pô pơblang