VOV4.Jarai - Čơtlăm lơ 23/3, ƀơi Ƀirô mă bruă Gong gai dêh čar ta, Khua dêh čar ta ơi Nguyễn Xuân Phúc tŭ jum Khua anih jưh pơ ala kơ dêh čar Áo Thomas Schuller-Gotzburg hăng ơi  Ingolf Schroeder, Khua git gai Sang bruă AT hăng S glăk hyu ĕp anih anom tuh pơplai rơwang bruă hơdră phrâo măi mok prong. Khua dêh čar ta ơi Nguyễn Xuân Phúc bơni ơi Ingolf Schroeder hăng ƀing dinh kơna mơng Sang bruă AT hăng S rai kơsem min hăng tuh pơplai, bơwih ƀong sĭ mơdrô ƀơi Việt Nam.

Khua anih jưh pơ ala kơ dêh čar Áo pơdah pran jua đăo gơnang rơwang bruă mơ̆ AT hăng S pok pơhai amra djơ̆ hăng pơđĭ kyar mơng Việt Nam kơ ngă pơhưč tuh pơplai hơdră phrâo măi mok. Anai lĕ rơwang bruă tuh pơplai prong hmâo năng ai ñu 1 klai 500 klăk euro prăk mă yua, ngă pơhưč năng ai ñu 6.000 čô mơnuih mă bruă. Bơni hơdôm tơlơi gum pơhiăp mơng AT hăng S, Khua dêh čar ta ơi Nguyễn Xuân Phúc lăi rơđah, hơdôm rơwang bruă tuh pơplai FDI phun ñu leng kơ truh kih. Gong gai dêh čar Việt Nam pơjing djop tơlơi gal kơ hơdôm mơnuih tuh pơplai dêh čar tač rơngiao bơwih ƀong truh kih ƀơi Việt Nam. Khua dêh čar lăi lĕ tơlơi kiăng anom mă yua ƀơi Thái Nguyên hăng ƀôn prong Hồ Chí Minh leng kơ gêh gal. Anai ăt lĕ tơhnal gal hăng hơdôm bôh anom bơwih ƀong prong mơng dêh čar tač rơngiao. Khua dêh čar ta čang rơmang AT hăng S tañ ba tơbiă pơsit tuh pơplai./.

Siu H’ Prăk: Pô pơblang