VOV4.Jarai - Jơnum hơdôm dêh čar gum hrŏm pơđĭ kyar mơtah hăng hơnong pơkă tar ƀar rŏng lŏn tơnah (P4G) thun 2030 pơphun mơng lơ 30-31/5/2021 lăng nao rai amăng tivi tui tơlơi git gai mơng Khua mir sir dêh čar Hàn Quốc ơi Moon Jae-in. Khua dêh čar ta ơi Phạm Minh Chính nao jơnum pơčrông sai hrŏm hăng khua mua pơprong kar hăng dêh čar ding kơna mơng P4G. Bruă mă yôm phăn hloh mơng Jơnum anai lĕ bơkơtuai khua mua pơprong amăng mơmŏt lơ 31/5/2021 (tui mông ƀơi Việt Nam) lăng nao rai amăng tivi kơplah wah ƀing khua mua mơng Hàn Quốc, Đan Mạch, Colombia, Khua Jơnum min kual Mi kô̆, Việt Nam, Hà Lan, Kenia, Costa Rica, Peru, Áo, Thái Lan, Kur, khua djru bruă gah ayuh hyiăng mơng Khua mir sir dêh čar Mi hăng Khua keh prăk kak jar kmar (IMF).

Amăng mông jơnum, ƀing khua mua đing nao pơčrông saui 3 mơta bruă ječ ră anai. Anai lĕ hơkrŭ glăi yua bơbeč mơng klin Covid-19, tơlơi gir run mơng djop dêh čar kiăng kơ ngă bơkơnar carbon truh thun 2050 hăng hơmâo lu bruă dong kiăng pơgang ayuh hyiăng hăng ngă gêh gal brơi ngă hrŏm bruă čar - hơjăn. Đĭ pơhiăp amăng mông jơnum bơkơtuai khua mua pơprong, Khua dêh čar ta ơi Phạm Minh Chính lăi pơtong klin hăng hơdôm bruă ngă tơnap tap, tơlơi lông kiăng kơ lu dêh čar ƀuh rơđah tơlơi yôm mơng bruă wai pơgang ayuh hyiăng. Khua dêh čar ta rơkâo, jar kmar kiăng gum tơngan hrŏm pơsir hĭ tơnap tap kiăng hơkrŭ glăi tơlơi bơwih ƀong huă kiăng pơđĭ kyar tañ hăng hơđong kjăp lơ̆m pơgang hĭ klin Covid-19.

Siu Đoan: Pơblang