VOV4.Jarai - Tom brơi lơ 4/6, ƀơi Ƀirô Kơnuk kơna, Khua dêh čar ta ơi Phạm Minh Chính pơhiăp telephôn hăng Khua dêh čar Khač ơi Lý Khắc Cường. Amăng mông pơhiăp telephôn, dua čô khua dêh čar hơmâo pơčrông sai lu mơta bruă kiăng hơkrŭ, kơtưn đăo gơnang nao rai; djru pơsir hơdôm bruă tơnap tap, pơlăi nao rai tơlơi găn rơgao hăng bơkơtuai kơ bruă pơtrut rô nao rai kơplah wah dua boh dêh čar pơ anăp anai.

Khua dêh čar Khač ơi Lý Khắc Cường pơpŭ Ping gah Cộng sản Việt Nam phrâo pơphun hiam klă Jơnum Ping gah tal XIII laih dong hơdôm bruă truh kih mơ̆ Việt Nam dưi ngă amăng pơđĭ kyar bơwih ƀong huă - mơnuih mơnam hăng pơgang klin Covid-19; pơsit tong Ping gah, Kơnuk kơna hăng mơnuih ƀon sang Khač lêng kơ lăng yôm tơlơi rô nao rai hăng dêh čar Việt Nam, amra ba tơlơi tô nao rai kơplah wah Việt Nam - Khač jai hrơi hiam klă, ba glăi tơlơi dưi sit nik kơ plah wah mơnuih ƀon sang dua bơnah; čang rơmang pơtrut bơkơtuai kơđi amăng kual ia rơsĭ kiăng kơ ba glăi tơlơi hiam klă hloh, hăng amra hrŏm hăng Việt Nam laih dong hơdôm dêh čar ASEAN tŏ tui gir run kiăng pơjing COC.

Siu Đoan: Pơblang