VOV4.Jarai - Ƀrô blan pơphun bruă mă yua kơ čơđai net thun 2021, Khua dêh čar ta hơmâo kĭ tơlơi pơsit mrô 830, lơ 1/6/2021 tŭ yua jơlan hơdră pơgang hăng djru brơi ƀing čơđai anet dưi mă yua klă, thâo pơčeh phrâo amăng plang internet rơwang thun 2021-2025. Anai lĕ tal blung a Việt Nam ba tơbiă sa jơlan hơdră gưl dêh čar kơ bruă pơgang brơi čơđai anet amăng lơ̆m yua plang ineternet. Jơlan hơdră hơmâo “Hơnong pơkă ha amăng plĕ”  hơmâo: Pơhlôm brơi hơgŏm hơdip hơdip kơ rĭm čô čơđai hăng pơgăn, pơsir hĭ hơdôm bruă pơsuh amăng plang internet bơbeč sat nao tơlơi hơdip kơ ƀing čơđai, amăng anun đing nao bruă črâo brơi ƀing čơđai thâo tui hluai rơnuk thun kiăng kơ ƀing čơđai dưi pơgang mă pô tơlơi hơmâo tơlơi pơsuh ngă sat amăng plang internet. Hơnong pơkă tal dua lĕ, jơlan hơdră amra pơhlôm hơđong, hăng pơđĭ kyar hơdôm plang, ứng dụng mơng Việt Nam djru brơi ƀing čơđai dưi hrăm, pơlir hơbit, ĕp lăng hơdôm tơlơi hiam klă.

Siu Đoan: Pơblang