VOV4.Jarai - Amăng tlam lơ 3/6, Khua dêh čar ta hăng ƀing khua mua Kơnuk kơna ta pơčrông sa kơ akŏ bruă man pơkra jơlan đuăi hmar rơwang thun 2021-2025 hăng anăp nao thun 2030. Hăng akŏ bruă man pơkra jơlan đuăi hmar rơwang thun 2021-2025 hăng anăp nao thun 2030, Khua dêh čar ta lăi pơtong, bruă pơđĭ kyar man pơkra jơlan đuăi hmar, hăng 4.000 km amăng 10 thun pơ anăp anai lĕ sa amăng hơdôm bruă tơnap tap biă mă, yua anun kiăng hơmâo tơlơi gum pơgôp mơng djop anom bruă hăng abih bang mơnuih ƀon sang. Khua dêh čar ta ơi Phạm Minh Chính rơkâo man pơkra jơlan đuăi hmar kiăng pơhlôm ba glăi tơlơi dưi dưm kơnar hăng sem lăng tơlơi bơbeč nao amăng djop mơta. Kiăng ngă pơgiong tui hơnong pơkă, tui Khua dêh čar ta akŏ bruă kiăng pơjing 3 mơta pơplih phrâo: jak iâu tuh pơ alin; pơpha wai lăng, mă yua; kơ bruă lŏn mơnai čuah pơtâo, gơnam yua amăng man pơkra jơlan. Khua dêh čar ta jao Ding jum wai lăng jơlan glông hyu hơduah tơña, gum hrŏm hăng djop ding jum, gơnong bruă, anom bruă, ƀon lan kiăng pơgiong akŏ bruă kiăng kơ Kơnuk kơna ta mơ-it, rơkâo tơlơi pơsit mơng Ding jum kơđi čar hăng Khua pơ ala mơnuih ƀon sang dêh čar.

Siu Đoan: Pơblang