VOV4.Jarai - Tlam lơ 18/3, ƀơi Ƀirô Kơnuk kơna, Khua dêh čar ta ơi Nguyễn Xuân Phúc tŭ jum Khul pơđĭ kyar ngă hrŏm bơwih ƀong huă Việt Nam- ASEAN. Amăng mông bưp, ƀing pô pơ ala brơi anom bơwih ƀong huă ding kơna Khul pơđĭ kyar ngă hrŏm bơwih ƀong huă Việt Nam - ASEAN pơdah pran pơpŭ bơni tơlơi đing nao, gum djru mơng Kơnuk kơna, djop ding jum, gơnong bruă hăng gong gai ƀon lan amăng hrơi blan laih rơgao; lăng yôm bruă mă mơng Kơnuk kơna amăng pơgang hĭ klin Covid-19, mơng anun dưi tŏ tui hơđong bơwih ƀong huă, sĭ mơdrô amăng hrơi blan anai.

Khua dêh čar ta lăi pơtong, Ping gah, Kơnuk kơna lêng kơ ngă gêh gal brơi mơnuih ƀon sang, anom bơwih ƀong huă pơđĭ kyar, hrưn đĭ kơtang amăng bơwih ƀong huă, wai pơgang tơlơi dưi mơng mơnuih ƀon sang, anom bơwih ƀong sĭ mơdrô. Khua dêh čar ta čang rơmang hơdôm anom bơwih ƀong sĭ mơdrô lăi hrŏm, hơdôm khul pơđĭ kyar ngă hrŏm bơwih ƀong huă Việt Nam - ASEAN hnun mơn, đing nao pơđĭ kyar hơđong, sĭ mơdrô tơpă sit, wai pơgang ayuh hyiăng rơhuông adai; pơgăn hưp ƀong kông ngăn, bruă plư pleč.

Siu Đoan: Pơblang