VOV4.Jarai-Tom brơi, lơ 10/3, ơi Nguyễn Xuân Phúc Khua dêh čar ta hăng Khua git gai ping gah, Khua dêh čar Lao ơi Thongloun Sisoulith laih anun Khua dêh čar Kur ơi Samdech Techno Hun Sen hơmâo bơkơtuai lăng nao rai amăng tivi.

Tal bơkơtuai anai kiăng ĕp hơdră pơtrut tơlơi ngă hrom dua bơnah, ăt kah hăng ngă hrom 3 bơnah, ba tơlơi ngă giăng mah rô nao rai klâo boh dêh čar đĭ amăng hnong phrâo, pơđĭ kyar hing ang hrom, pơdrong asah. Ƀơi mông jơnum, hơdôm čô khua dêh čar git gai Jơnum min ngă hrom pok pơhai hơdôm boh yôm phun rơđah rơđong tui anai:

Kah hăng Pơkă lăng akŏ bruă pơđĭ kyar bơwih ƀong huă mơnuih mơnam dêh čar amăng kual ƀơi akiăng klâo bơnah jơlan guai tơkuh sô̆ nao rai klâo boh lŏn ia Việt Nam, Lao, Kur mơ̆ng thun 2021-2030 tui hăng tơhnal juăt ngă laih amăng 10 thun rơgao.

Pơkra hơdră, akŏ bruă hăng kơčăo bruă pioh ngă tui bruă pơtruh nao rai bơwih ƀong huă ba tuai hyu ngui amăng anih tơkuh klâo jơlan guai dêh čar Kur, Lao, Việt Nam mơ̆ng thun 2020-2025, lăng nao pơ anăp adih truh thun 2030 hơmâo pơsit laih amăng mông jơnum pơđĭ tui tơlơi thâo hluh nao rai tơdruă tui hơbô̆ “Klâo boh dêh čar, sa anih či nao” laih anun pơtrut tuai čuă ngui hơđong kjăp.

Nay Jek: Pơblang