VOV4.Jarai - Amăng mông jơnum lok 11, Khua pơ ala mơnuih ƀon sang dêh čar tal 14, Khua git gai Ping gah, Khua mir sir dêh čar ta ơi Nguyễn Phú Trọng pơđok hră lăi pơthâo bruă mă rơwang thun 2016-2021 mơng Khua mir sir dêh čar. Sa amăng hơdôm bruă amăng rơwang thun mă bruă laih rơgao anun lĕ pơplih glăi lu khua mua pơprong amăng Kơnuk kơna. Khua mir sir hơmâo kĭ hră ruah 5 čô kơ-iăng khua dêh čar, 21 čô khua ding jum hăng ƀing ding kơna pơkŏn dong amăng Kơnuk kơna rơwang thun 2016-2021.

Khua git gai Ping gah, Khua mir sir dêh čar ta ơi Nguyễn Phú Trọng hơmâo lu bruă pơtom hiăp yôm phăn, pơhlôm hơđong lŏn ia, hrưn đĭ kơdrưh hăng tơlơi đăo gơnang mơng dêh čar Việt Nam amăng kual hăng jar kmar. Khua git gai Ping gah, Khua mir sir dêh čar ta ơi Nguyễn Phú Trọng lăi pơtong, bruă ngă mơdưh pran khăp kơ lŏn ia, pran kơtang mơng djuai ania, pran gum pơgôp mơng djop djuai ania hăng pơtrut pơđĭ kyar lŏn ia pơdrong asah, yâo mơ-ak lĕ hơdôm tơlơi găn rơgao yôm phăn.

Pơ anăp anai, kiăng tŏ tui pok prong, pơđĭ kyar hăng klă dong amăng bruă pơtom hiăp, pơjing pran đăo gơnang bruă kơđi čar hơđong kjăp hăng dêh čar tač rơngiao, pơsir lăp djơ̆, tŭ yua tơlơi rô nao rai hăng hơdôm dêh čar ha guai, dêh čar pơdrong asah, dêh čar ngă hrŏm djop mơta kah hăng hơdôm dêh čar pơkŏn, pơhlôm rơnuk rơnua, hơđong kiăng pơđĭ kyar lŏn ia.

Siu Đoan: Pơblang