VOV4.Jarai- Mơguah tom brơi, lơ 10/3, ƀơi mông jơnum khua mua pơ ala mơnuih ƀôn sang tơring čar Kon Tum tal XI, rơwang bruă 2016-2021, ơi Nguyễn Ngọc Sâm, Khua git gai Ping gah tơring glông Sa Thầy, dưi ruah ngă Kơ-iăng khua Jơnum min mơnuih ƀôn sang tơring čar Kon Tum hơmâo 40/43 pok hră ruah.

Ơi Nguyễn Ngọc Sâm (pô tal dua yap mơ̆ng hnuă) ruah đĭ Kơ-iăng Khua tơring čar Kon Tum

Hrom hăng ruah pơhrua Kơ-iăng khua tơring čar, anom bruă khua pơ ala mơnuih ƀôn sang tơring čar Kon Tum ăt ruah ding kơna apăn bruă Jơnum min mơnuih ƀôn sang tơring čar hăng ơi Nguyễn Văn Điệu, ding kơna ping gah tơring čar, Khua Gơnong bruă prăk kăk tơring čar. Ƀơi mông jơnum, khua mua pơ ala mơnuih ƀôn sang tơring čar Kon Tum ăt pơsit hĭ 17 pok hră pơtrrun, amăng anun 2 pok hră pơtrun kơ mơnuih mă bruă hăng 15 pok hră pơtrun pơkă sa hnong bruă amăng tuh pơ alin pơkra jơlan glông amăng tơring čar.

Nay Jek: Pơblang