VOV4.Jarai- Tlam lơ 24/3, ơi Dương Văn Trang - Ding kơna Ping gah dêh čar, Khua git gai Ping gah git gai tơring čar Kontum mông mă bruă hăng grup hlăk ai bơwih ƀong sĭ mơdrô tơring čar. Hơmâo akŏ pơjing mơng blan 12/2020, grup hlăk ai bơwih ƀong huă tơring čar Kontum ră anai hơmâo 154 čô ding kơna hăng 10 khul, 11 grup. Hơdôm khul grup hơmâo tŭ mă tơlơi dưi, tơlơi gal dưi rông đông trùng hạ thảo pla, pơkra pơjing, pơhrui hơmâo hmăi pơtơi mraih; pơkra pơjing hăng sĭ mơdrô kơphê; pơkra pơjing, pơđĭ kyar lu gơnam tam brơi tuai čuă ngui yôm phara.

Khua git gai Ping gah tơring čar Kontum đĭ pơhiăp amăng mông mă bruă

Grup hlăk ai bơwih ƀong sĭ mơdrô Kontum ăt hơmâo pơphun lu bruă djru mơnuih mơnam, djru brơi sang anŏ tơnap tap hăng rơnoh prăk rơbêh 160 klăk prăk. Đĭ pơhiăp amăng mông mă bruă, Khua git gai Ping gah tơring čar Kontum čang rơmang hơdôm anom bơwih ƀong sĭ mơdrô amra ĕp jơlan yak nao phrâo kiăng kơ tŭ mă klă 2 tơlơi dưi, tơlơi gal prong amăng tơring čar; bơwih brơi tuai čuă ngui hăng pla phun akha kyâo. Pơ anăp anai, hơdôm anom bơwih ƀong sĭ mơdrô kiăng gir run pok prong lu hơbô̆ bruă bơwih ƀong sĭ mơdrô, pơlir hơbit hăng anom bruă pơkŏn amăng tơring čar kiăng pơđĭ kyar bruă tuh tia pơkra pơjing, biă mă ñu bruă pơkra akha kyâo, gơnam đang hmua anăp nao ba sĭ mơdrô pơ tač rơngiao, pơjing gơnam yôm phara ƀơi tơring čar Kontum.

Siu Đoan: Pơblang