VOV4.Jarai - Mơguah lơ 3/6, ƀơi Sang bruă Khua pơ ala mơnuih ƀon sang dêh čar, Khua git gai pơ ala mơnuih ƀon sang dêh čar ơi Vương Đình Huệ hơmâo mông bơkơtuai mơng ataih hăng Khua git gai pơ ala mơnuih ƀon sang dêh čar Kur ơi Xăm-đéc Hêng Xom-rin. Ƀơi mông bơkơtuai, dua čô Khua lăng yôm biă hơdôm tơlơi dưi ngă amăng tơlơi rô nao rai klă hiam mơng dua boh dêh čar amăng thun blan rơgao. Amăng hrơi mông glăk hơmâo klin Covid-19, khua mua dua boh dêh čar ăt pơhiăp nao rai na nao mơn; hơdôm bruă ngă hrŏm dua bơnah ăt đĭ kyar mơn; prăk pơhrui mơng bruă sĭ mơdrô gơnam đĭ lu, 4 blan akŏ thun 2021 hơmâo giăm 3 klai 900 klăk dolar Mi, đŏ 122% pơhmu hăng tơđar thun hlâo, gum rŭ glăi tơlơi bơwih ƀong mơng dua boh dêh čar, pơđĭ tui tơlơi hơdip mơnuih ƀon sang.

Dua čô khua git gai pơ ala mơnuih ƀon sang dêh čar tŭ ư lăi, amăng tơlơi ngă hrŏm lu bơnah, Ƀirô khua pơ ala mơnuih ƀon sang dua boh dêh čar ăt pơpŭ nao rai hơdră ngă bruă hăng djru nao rai ƀơi hơdôm mông jơnum pơtruh nao rai ƀirô khua pơ ala mơnuih ƀon sang amăng kual hăng jar kmar kah hăng IPU, Khul pơlir hơbit pơ ala mơnuih ƀon sang rŏng lŏn tơnah, Jơnum min pơtruh nao rai ƀirô khua pơ ala mơnuih ƀon sang hơdôm boh dêh čar kual Đông Nam Á, Ƀirô khua pơ ala mơnuih ƀon sang pơhiăp tơlơi Prang, Jơnum min pơ ala mơnuih ƀon sang kual ASIA hăng pơ ala mơnuih ƀon sang ASIA - Thái Bình Dương.

Siu H’Mai: Pơblang