VOV4.Jarai - Mơguah lơ 24/3, ƀơi sang bruă Khua pơ ala mơnuih ƀon sang dêh čar, pơphun jơnum lok 11, khua pơ ala mơnuih ƀon sang dêh čar tal 14. Pơhiăp ƀơi mông jơnum, Khua git gai pơ ala mơnuih ƀon sang dêh čar yă Nguyễn Thị Kim Ngân lăi, anai lĕ mông jơnum pơtruh nao rai, gum bruă jao glăi rơwang thun ngă bruă mơng djŏp anom bruă kơnuk kơna. Khua git gai pơ ala mơnuih ƀon sang yă Nguyễn Thị Kim Ngân lăi, ƀơi mông jơnum anai, Khua mua pơ ala mơnuih ƀon sang dêh čar amra ngă bruă kah hăng, pioh mông bơkơtuai, pơtŏng glăi bruă mă amăng rơwang thun tal 14 mơng Khua mua pơ ala mơnuih ƀon sang dêh čar; sem lăng hră lăi pơthâo bruă mă rơwang thun 2016-2021 mơng: Khua mir sir, Jơnum min apăn bruă pơ ala mơnuih ƀon sang dêh čar, Kơnuk kơna, Khul wai lăng djuai ania, hơdôm Jơnum min mơng Ƀirô khua pơ ala mơnuih ƀon sang dêh čar, Sang phăt kơđi kơnuk kơna, Sang wai lăng bruă tơgŭ kơđi, sang bruă jŭ yap prăk kăk kơnuk kơna. Hluai tui anun, amra sem lăng, hluai tui Tơlơi pơtrun kơ bruă mă mơng djŏp anom bruă kơnuk kơna rơwang thun 2016-2021.

Siu H'Mai: Pơblang