VOV4.Jarai - Giăm hmâo 146 klai prăk mrô gum pơčruh kơ Keh prăk mơnuih mơnam gum djru pran jua yôm phăn mă bruă amăng mông ngă Lơphet “Abih bang mơnuih ƀôn sang djru hrom pơgang, pơgăn klin Covid-19” hăng pok pơhai jơlan hơdră “Vaccine kơ abih bang mơnuih mă bruă ƀơi sang bruă” phrâo pơphun amăng čơtlăm lơ 3/6 ƀơi Phun akha khul mut phung dêh čar Việt Nam. Jơlan hơdră kiăng iâu pơthưr djop mơnuih djru bruă pơgang, pơgăn klin Covid-19, iâu pơhrui ngăn rơnoh mơnuih mơnam pioh mơnuih ƀôn sang, amăng anun hmâo mơnuih mă bruă ƀơi sang bruă amra dưi tlâ̆o vaccine tañ hloh. Mrô prăk djru anai amra mă yua kơ bruă pơgang pơgăn klin Covid-19, amăng anun đing nao hlâo blơi vaccine kơ hơdôm mơnuih gah hơdră bruă, mơnuih ƀun rin, mơnuih mă bruă gah sang bruă, djru wai lăng klin, pơgang tơlơi suaih pral, pơhlôm tơlơi hơdip mơnuih ƀôn sang. Pơhiăp amăng mông ngă lơphet, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo hơdôm ƀirô bơdjơ̆ nao lăi pơthâo rơđah hơdôm prăk pơhrui hmâo, yua djơ̆ bôh than, ba glăi bôh tơhnal tui tơlơi pơkă amăng tơlơi phiăn kiăng sit nik pơgang, pơgăn klin Covid-19./.

Siu H’ Prăk: Pô pơblang